Ua fetaui le faaaliga a le Aoga tusiata ma le falemataaga a le Ekalesia Faapotopotoga Kerisiano Samoa i Malua ma le usuia o le fonotele o lenei tausaga.
Na saunoa le alii pule aoga, Susuga Liufau Pelenato, o le tausaga muamua lenei talu ona faatu maoti le Aoga Tusiata. Lea ua iai ma le fale mataaga. Ua ese lava foi lona ia pulega. Lea e oo mai nei ua toa fitu ana faiaoga, ma lona ia lava pule, pei ona tofia iai le susug Liufau o Auala ma Manono e nate vaaia.
O le isi itu ua faia ai le faaaliga i le taimi nei, ina ua lava tapenaga a fanau e faia ai le faaaliga.
“Ua tasi le aoga ma le museum, pei lava o le maketi ma le maumaga. Ua tasi foi ma lona pulega, o loo galulue ai faiaoga e toa fitu, e tutoatasi lava le aoga tusiata.
O loo totogi uma lava le faagaioinga o le aoga e le EFKS. Peitai o loo totogi foi pili o tamaiti aoga. E $220. I le kuata i le tausaga muamua, $270 tala i le kuata mo tamaiti tausaga lua, $320 i le kuata mo tamaiti tausaga faauu, le lona tolu. O le tausaga muamua lenei ua fai si toatele. Ua oo atu i le 70 tamaiti. Ua maua foi faamanuiaga, i le taulia le o ata, aua o le faamoemoe e tatau ona faatau ata e fesoasoani i le aoga, ma faamalosia ai tamaiti e tusiata, ae o le a fataamilo foi a latou ata i totonu o le atunuu ma atunuu i fafo.
O ata e faatauina i le va o le $50 tala e oo i le $5afe tala le tau o le ata e tasi. Ma o nisi o tamaiti aoga, o le a mafai ona maua ai mea aogā a o latou aiga.
O le lona 18 a’i lenei o vaiaso talu ona a’e le aoga. O tamaiti o le vasega lea o loo fefiloai lava mai le tausaga muamua, lua ma le tolu, o le tausaga lava lenei, e to’a 10 le aufaauu.
O le miti a nei fanau, pei ona talanoa le faiaoga, Susuga ia Liufau, pe a uma le aoga, ia avea ma tagata tusiata, ia avea o se faiaoga tusiata, ia avea le tusiata e maua ai tupe mo le aiga. O nisi o fanau, na iu ua malaga atu i fafo e toe faaauau ai aoaoga.
Na saunoa foi Liufau, “O luitau, o le taumafai lea ia siitia le aoga i itu tau seleni ma le faalauiloaina lava o lenei matata o le tusiata.”
“Aemaise ai lava o le tau faatalitonuina o matua a’e o le atunuu, o le taleni lenei e maua ai le lumanai o le tamaitiiti. O isi mātua e faapea e lē maua ai se lumanai o a latou fanau i le vaai iai faalemafaufau.”
Ae o lenei lava e maua ai tupe, pei ona molimauina i le faaliga lenei talu ona amata mai i le Aso Faraile talu ai.
Penehuro ma le BEN
O se tasi lea o fua aliali o le aoga tusiata a le Kolisi o Malua. Lea ua fanau mai ai le mau faaaliga faalevaomalo, ua lauiloa ai Samoa, ona o le tomai o le Susuga Papalii Penehuro. Na talanoa foi lenei tamalii tusiata, ua faasee atu lana aoga i Vaitele ma faaauau ai ona aoao tamaiti. Peitai ua galulue ai nei i maa, ma tu matilatila ai foi lana ia galuega tusiata ia Samoa atoa.
Ona e leai se isi lava tusiata ua faaaogāina maa pei ona faia nei i le aoga a le BEN Beautiful Expression of Nature i Vaitele. Saunoa foi Papalii, o lona loto atoa le aoga tusiata lea a le EFKS, auā na amata mai ai lona ia foi soifuaga faatusiata. Peitai e aoga lava mea e tutupu e maua ai suiga i le olaga atinae. O loo tapena atu foi le aoga tusiata a le BEN i Vaitele i le latou foi faaaliga o measina a Samoa e faatino ma faaata mai maa ma ‘alā.
Peitai o le faatumaoti ai o le aoga Tusi Ata ma le falemataaga i Malua mai le Kolisi o Leulumoega fou, o se tasi lea o auala ma avanoa pei ona talanoa ai le susuga Liufau, e faalauiloa atu ai agavaa o fanau, ae o se isi foi laasaga agai i luma o atinae fai a le Ekalesia. O loo tatala pea le fale mataaga mo le faaaliga, o ata tusi, ata vali, ma ata vane mo le vaiaso atoa lenei o loo usu ai le fono mo maimoaga.
