Tumau pea faigauo a David Tua ma le TV Maori

O le saunoaga manino a le alii faatonu sili o le televise a tagata Maori, le susuga ia Jim Mather, sa ia faailoa ai le tumau pea o le lagolago a le televise mo David Tua. E le gata i se pepa o faamatalaga sa tuuina mai, ae sa maua foi le avanoa o le Samoa Times, e talanoa tuusao ai ma le alii faatonu.
O le manatu ina ia ao pea ona faafofoga ma silasila le au faitau i le saunoaga ma se faamatalaga mai i le televise a Maori, e ese mai i se lipoti sa tusia muamua i le tatou lomiga o le vaiaso talu ai, sa tuuina atu e auala mai ia Toailetai David Tua.
Ae peitai o le Aso Faraile lava o le vaiaso talu ai ina ua maea le feiloaiga faalauaitele ma le au faasalalau, sa maua ai se avanoa e feiloai atu ai i le alii faatonu, ma toe fesiligia ai i le mataupu lava lenei.
O se fiafiaaga ina ua mafai ona talanoa mai le susuga ia Jim, ma ia auiliili ai le agaga ma le manatu o tagata Maori, e auala mai i le auaunaga a le televise. O le faaliliuga lenei o se vaega o lana saunoaga e faapea:
O David Tua mai le amataga o lona taumafai, sa iai lava le lagolago a tagata Maori. O le faamaoniga o lea manatu, sa faatino e galuega a le televise. O le mulimulitai o manaoga ma faamoemoega mai tagata lautele, sa faapea lava ona faatumauina, e tusa poo fea e agai i ai le tama fusu.
O le mafutaga ma David Tua e tau leai ni upu e faamatala ai, aua o se mafutaga sa faavae mai i manaoga soofaatasi, ma faasolosolo ina tulai mai nisi o pine e atili faamausali ai.
O le manaoga o le televise a Maori e uiga i taaloga a Tavita, e tatau lava ona maua e tagata uma le avanoa e silasila ai ma maimoa i soo se taaloga, nai lo le taumafai e totogi ni tupe. E matua teena lava e le toatele lea tulaga, e le gata i tagata Whenua lava latou ia ma le latou mau, ae talitonu e faapena foi i tagata Samoa ma Niu Sila atoa.
O le isi mafuaaga lea o le taumafai e tulituliloa pea David Tua ma lona faamoemoe, poo fea lava e fai ai, Niu Sila poo se isi atunuu i fafo atu.
O le mataupu i le maliliega sa sainia, o le faamoemoe lava foi lea e tasi, o le fia faamautuina o le manaoga o loo iai o le mulimulitai i le mea o loo agai i ai Tavita. E lei mamao tele atu sa sainia ai se konekarate na malilie uma i ai veaga e lua, o David ma le televise a Maori. O lea maliliega sa ioe ai e tuuina mai aia tatau e faasalalauina ai fusuaga e tolu o loo tau lalata mai a David. O le fusuaga sa faia ma Shane Cameron, o le fusuaga lea sa tatau ona amata ona faataunuu ai lea sainiga lima. Peitai e lei mafai ona tupu lea tulaga, ona o nisi lava foi o faiga faapolokiki.
E ui lava la i lea faaletonu sa tulai mai, ae o le taimi nei e tautino atu, e tumau pea le lagolago a le televise mo David Tua. O le fiafiaga tele ina ua vave ona faamautu mai taaloga sosoo e tolu i le tausaga fou, ma o le a taumafai foi i se mafai e faamalieina ai le silasila mo le faasalalauina o ia fusuaga.
E le gata i lea, ae iai foi isi fesoasoani e mafai ona faaauau ai pea le galulue mo le manaoga ma le faamoemoe o David, ia umia le siamupini o le lalolagi i le paga mamafa.