Ua faatea se tasi o matai o le afioaga o Apia i le mae‘a ai o le fonotaga a alii ma faipule ona o ni faamatalaga ua lafo i le aumaga atoa ai ma le faailoaina o lona manatu i le sui o le afioaga lea o le a tamoe mo le faigapalota.
O le faatea ai o le afioga ia Tauamamanuvao Falani Mano Le Mamea mai le afioaga o Apia ona e faapea na ia faia ni faamatalaga lē mafaufau e faasaga i le sui o le a tauva i le faigapalota mo Apia.
I se tusi mai le pulega o alii ma faipule o le afioaga, na faaalia ai vaega ua ala ai ona faatea lenei matai o le afioaga.
Ua tolu fono sosoo e leai sau faanoi. Ua faaalia mai e nisi o tamalii o le nuu o loo outou faatasi i le tanoa ‘ava, o loo e auai i le soona faia ma le lafo o faamatalaga lē mafaufau ma faatasina ai le afioga ia Faaolesa ma lona sauni atu i le faigapalota.
O lou talanoa i mataupu tau le lotoifale o le nuu i nofoaga faitele. Ma lou aiā valea i le sā ma leoleoga.
Saunoa le afioga i le pulenuu o le afioaga, ia Tuiletufuga SiaosiTuiletufuga, o faamatalaga a le afioga Tauamamanuvao na lafo ua lē talafeagai ma tulaga o loo iai le unai a le afioaga. Tali le afioga ia Tauamamanuvao, e iai le tāua o lona lafo ai o faamatalaga nei i le aumaga o le afioaga ona o le sa.
Ta‘ua e lea matai, o lona faagaulemalie na faaali i se tasi o po na oo ai lava i le leoleoga a taulelea o le nuu ona o le itu lea mai i le 1am i le vaveao seia oo i le tusa o le 4am i le vaveao lava e ili ai le pu o le sa ma o se faalavelave tele i le nuu, ma o lana faagaulemalie na fai ai i taulelea pe aisea e tatau ai ona ili faasoloatoa le pu a o lea lava ua silafia e le nuu le taimi o le sā ma ua faalavelave tele i tofaga a le afioaga.
E lei ‘alo le matai ia Tauamamanuvao ina ua fesiligia i faamatalaga lē mafaufau e pei ona ta‘ua i le tusi, e faasaga i le sui tauva o loo unai faatasi ai le afioaga o Apia ma na ia ta‘ua o suaga lava na faia e lē na o ia foi ae na faia i luga o le ‘ava Samoa ma nisi o tamalii o le nuu lea ua foliga mai ua toe lipoti e sui o le afioaga i saofaiga a le nuu.
Ua mae‘a ona faaoo le finagalo o Tauamamanuvao e fia tauva i le faigapalota o le tausaga fou ae o lea ua tasi le afioaga i se tasi o sui ma na fesiligia le matai pe lē ua avea lona fanoga ma mafuaaga ua manatu ai le afioaga ua faasagatau atu i le sui ua tasi i ai le nuu, ae na ta‘ua e Tauamamanuvao, e le o iai sona manatu e tetee i le sui ae ua manino foi i lana aiā tatau e mafai ai ona tauva i le faigapalota.
Faaalia e Tuiletufuga, e lē o taofia le tauva ai o le matai i le palota tele a le atunuu ae ua tasi lava le afioaga i lana sui e agai i lea tausinioga. O lenei tusi e faapea na tuuina atu ia Tauamamanuvao i le mae‘a ai o le fono, ae saunoa Tauamamanuvao, e lei oo atu se tusi ia te ia.
