I le faamasinoga faaitumalo, e lei tuuina atu se tali a le tina talavou o Seutatia Ta‘ina lea o loo tuua‘ia, o ia e ana le pepe tama na fanau lafoai, ae maua atu ai le pepe e se taifau a se aiga ma toso loa i le fanua o le aiga e ana le meaola. Na maua e le aiga le pepe ua uma le ola.
O loo molia lea tamaitai i le moliaga o le lafoai o le oloa tāua peitai o loo faatali se lipoti mai le fomai na faia le taotoga faapitoa e sailia ai le mafuaaga o le maliu, o le a iloa ai pe o le a molia loa Seutatia i le fasioti tagata faamoemoeina.
O loo tolopo foi le mataupu i le aso 5 o le masina fou o Novema e faatali ai le mae‘a o suesuega a leoleo.
Na faaalia se finagalo o le alii faamasino le afioga Vaepule Vaemoa Vaai i le tuuina atu o le mataupu lenei i le faamsinoga e faapitoa i mataupu faaleaiga poo le Family Court, ua ia faaalia foi pe afai ae faasala le tina o Seutatia i le falepuipui o le a lē maua ai se fesoasoani mo ia i lona faafitauli.
O le a faatoa iloa se isi laasaga o le mataupu lenei pe a toe fofogaina i le masina fou o Novema. O le tamaitai o Seutatia e faigaluega i se tasi o matagaluega a le Malo, ma e faapea ni lipoti, sa nofo o ia i se aiga i lea vaega o Vaitele-fou lea na tulai mai ai le solitulafono.
