O le vaiaso ua mavae lea sa faataunuuina ai le faamoemoe mo “Tupulaga Ala Mai” (Youth Alive) a le Ekalesia o le Worship Centre, a o alo ai foi lea Ekalesia mo le faamaeaina o lana Fono Tele mo le lua vaiaso.
E tusa ma le 43 ausiva sa tauva ai i lea tauvaga Siva Faaleagaga e pei ona amataina mai i le 2004. Na faaalia e le susuga i le faafeagaiga, Siagigi Vaafusuaga, o le Taitai foi o le Autalavou, o le tausaga nei 2009 ua tulai mai ai le 43 ausiva eseese mai soo se ituaiga tapuaiga i Samoa.
O nei ausiva a tupulaga talavou, ua avea o se fesootaiga ma le masaniga a tupulaga e fetufaai ai taleni ma faiva, i luga o se tapenaga sili ona lelei e viia ai le Atua.
O le autu o le faamoemoe e pei ona lagaina ma amata faavae mai e le Ekalesia a le Worship Centre i Apia, o le faatalaleleiga lea o tupulaga o Samoa, e pei ona faalauiloa soo i lea polokalame, o sauniga lotu ma luga i leitio e le taitai o lea Ekalesia, Susuga Viliamu Mafo’e.
Faaalia foi e Siagigi Vaafusuaga, e ui lava o siva faaleagaga, ae tele se feau e momoli atu ai le Tala Lelei ma le faaolataga i tupulaga talavou a Samoa.
A fua i lea polokalame talu ona faavae mai, ona mautinoa lea i le vaiaso tonu na tatala ai lea faamoemoe i le faatumulia i le mamalu o le atunuu, aemaise lava o tupulaga.
E tolu po na faia ai lea polokalame, ma na matauina ai e le sui o le tatou nusipepa e silia i le 1,000 i latou na talia le faaolataga, poo le tautino foi ua avea Iesu Keriso ma Alii ma Faaola i o latou olaga.
O le ai o lea faamoemoe, e pei ona molimauina i le toatele o tupulaga ua liliu atu i le faaolataga, mai i olaga leaga ma le palapala sa ola ai.
Lea foi la na faaalia e Siagigi Vaafusuaga, o loo molimauina lava i faamasinoga le toatele o tupulaga ua molia i le tulafono.
O latou o loo tagofia le avamalosi ma faia nisi amioga mataga, ae faapea foi latou o loo molia i le gaoi ma le talepefale. E le gata i lea o le faitaaga ma le mulilua, poo le faia o nisi o feusuaiga le manaomia.
O le tele o nei solitulafono, ua faia i ai le sao o le Ekalesia e ala i lenei polokalame taua. O le tau ave esea lea o mafaufau o tupulaga mai le taupulepule e faia ni solitulafono, ae avea i latou o tupulaga e fiafia e mafuta i le Alii.
E ui lava foi na laugaina le Upu a le Atua i na po e tolu, toatele le au faaolaina, ae toatele foi tupulaga e le i sulugia lava o latou mafaufau i le Tala o le Ola.
Sa molimauina lava nisi e faasuava (iloa i le manogi pia), o le ulaula tapaa, ma le faaamuamu i le taimi o le lauga.
Ae na molimauina e nisi tupulaga sa latou talia ma le faamaulalo le Upu a le Atua (lauga), na fetagisi ma sisii o latou lima, toatutuli ma faaalia lo latou salamo faamaoni mai i le olaga tuai sa ola ai.
Faailoga – E tele lava ni itu sa fua i ai le Faamasinoina o le Tauvaga. O le tutusa lelei o taga, ia iai ni taga fou, lelei le faiga o taga o le siva. O le feau taua e momoli mai i le siva, o le taimi faatulagaina e lima minute, faapea ma le matagofie o le togiga.
O le faaiuga a faamasino, ua autasi e tuuina atu le manumalo i le ausiva a tama aoga o le Kolisi o Sagato Iosefo i Alafua. Tulaga (2) – Moataa, (3) – Amerika Samoa, (4) – Motootua, ma le tulaga (5) o Iva i Savaii.
O le togiga matagofie, na maua lea e le Ausiva a Iva. O le alii siva lelei, na maua e le alii o Sivai Lui, ma le tamaitai siva lelei, na maua e Faalelei Tofala o Apia. O le faailoga, o pepa malaga tafao mo Niu Sila poo Ausetalia.
O le alii siva laititi, o Salvation Uili mai Moataa, ma le alii siva malie, o le tama o Sam mai Sogi.
Ua faamoemoe e maea le Fonotaga e lua vaiaso a le Ekalesia o loo usuia i Apia, ona faatauina lea o lipine DVD o lenei tauvaga siva. Ua faamoemoe foi o le a faatauina i Niu Sila, Ausetalia ma isi atunuu o le lalolagi e pei ona sa faatau muamua ai.
Pe na mautinoa e Michael Jackson le taunuuga o lona ola? – O se fesili na fesiligia ai i lea po e le susuga i le faifeau, Siagigi Vaafusuaga, le mamalu o le atunuu aemaise tupulaga.
E pei ona silafia, faatoa maliu atu le alii pese ma siva fegauigauiai lauiloa i le lalolagi o Michael Jackson, le fia miliona o le lalolagi sa latou misia, fetagisi ma faanoanoa ina ua maliu lea alii o Michael. Ae o le fesili, o fea o iai o ia? Poo seoli poo le ola e faavavau? Atonu lava o le a tali lava ia i le taunuuga o lona ola, pe na faafiafia i le lalolagi, pe sa faafiafia i le Atua.
Ae e manatua i lea alii tautaua, ana taga, o ana gaioiga, lea lava ua liliu e tupulaga Samoa nei taga e faaaoga mo pese faaleagaga. Ua liliu atu nei taga faalelalolagi e fai ma taga matagofie e viia ai le suafa o le Atua.
Toatele tagata taualoa, tagata popoto ma atamamai, ae o loo iai se mea o misi i o latou olaga. Latou te lei iloa atu le Atua. Latou te lei talia Iesu e fai ma Alii ma Faaola i o latou olaga.
Latou te lei talia foi le faaolataga. Latou te le o mautinoa foi, poo fea le taunuuga o lo latou faamoemoe pe a oo mai le oti. O le fesili, o fea la o iai nei Michael Jackson?
