Ua taofia nei e leoleo i le toese i Tafuna se alii mai Aua, lea ua tuua‘ia i lona faaaogā lea o se tamai naifi e tui ai le fatafata o lana uo teine, ao moe le tamaitai i le latou fale. O le alii o Sione Pulou mai Aua, ua tuuaia nei e le malo i moliaga mamafa e lua o le faaoolima i le tulaga muamua atoa ai ma le faaoolima i le tulaga lua.
O le mataupu lenei na tofu atu i le Ofisa o Leoleo i Fagatogo i le vaveao o le aso 18 Aokuso ina ua logo e le aunty o le tamaitai na aafia leoleo mo se fesoasoani, ona o se tagata sa ia faaoo manua i lona niece, ma tofia ai loa le alii leoleo ia PSO. Salefasa Matatule na te suesueina lenei mataupu.
Na faailoa e le aunty i leoleo, o lona niece na osofai e lana uo tama i se tamai naifi, o Pulou le igoa o le uo tama. A o agai atu leoleo e tali i le valaau, sa maitauina ai e leoleo se alii o loo savali i luga o le alatele i le taimi lea o le vaveao, e foliga mai foi e ona o ia, o lea na fesili ai loa leoleo i lona igoa, ae tali le alii, o ia o Pulou mai Aua.
Na vaaia e leoleo le sisina o le afu o le alii, atoa ai ma le manogi pia o loo sau mai lona tino, o lea na faatonuina ai loa o ia e oso i totonu o le taavale, ma latou agai atu ai loa i le ofisa o leoleo i Fagatogo mo suesuega.
Ina ua taunuu Pulou ma leoleo i le ofisa i Fagatogo, sa faailoa e leoleo i le alii ua molia ona aia tatau faaletulafono, aemaise ai o le le faamalosia lea o ia e faia sana faamatalaga e tusa ai o tuuaiga faasaga ia te ia, peitai na faailoa e Pulou i leoleo, ua ia malamalama i ona aia tatau faaletulafono, ua ia manao foi e fai sana faamatalaga e tusa ai o le mea sa tupu.
Na taua e Pulou i leoleo e faapea, i le po ae lei tulai mai le faalavelave, sa nofonofo ai i lona fale na o ia, ae faafuasei loa ona oso ona mafaufauga ita i lana uo teine, i lona le faamaoni ia te ia, aemaise ai foi lona manatu e faauma le la mafutaga.
Na avea le ita o le alii ua molia i lana uo teine ma itu na alu ai loa ma faatau mai ana fagu vailima lapopoa e tolu, ona nofonofo ai loa lea i lona fale na o ia ma inu. Na taua e Pulou i leoleo e faapea, ao faia lana inugapia na o ia i lea po, sa ese lava lagona na oso atu i lona loto, fai mai e alu e tui lana uo teine ia oti.
E lei toe faatali le ua molia, ae ua tu loa i luga ma savali loa e faataunuu mafaufau ia ua oso atu i lona loto, o lea na alu ai loa i le fale o lana uo teine, ulufale faamalosi i totonu, ma agai atu ai i le potu o loo moe ai o ia, ma ia faatinoina loa mafaufauga o loo i lona loto, e ala i lona ta tui ina o lona fatafata i se tamai naifi, ina ua maea, sa sola ese loa.
Na taua e le tamaitai na aafia i leoleo e faapea, sa pei o sana miti sa fai ao moe ina ua faafuasei ona ia faalogoina le tiga o lona fatafata, ae o le taimi lea ua tui ai e le tagata o ia i le naifi.
Na taua e le tamaitai e faapea, na vave lana mau i le lima o le tagata na tuia o ia, i lona fia iloaina lea poo ai, ae ina ua ia pupula sa ia vaaia ai lana uo tama o Pulou i ona tafatafa. Na taua e le tamaitai na aafia le sola ese o lana uo tama i le taimi lea, ae ua ee loa i luga i lona fia maua o se fesoasoani.
E 6 filo na manaomia e tapuni ai le manua na aafia ai le tamaitai na manua, ina ua auina atu o ia i le falemai mo togafitiga i le vaveao na tulai mai ai le faalavelave. E lei manao Pulou e faataunuu sana uluai iloiloga i luma o le faamasinoga faaitumalo, ae ua ia manatu e tuu sao atu loa lana mataupu i luma o le faamasinoga maualuga e faaauau ai lana faamasinoga, ma faatulaga ai loa le aso e faia ai lana uluai iloiloga.
E $50,000 lea faatulaga e totogi ona faatoa mafai lea ona tatala Pulou i tua mai le toese i Tafuna, e faatalitali ai taualumaga o lana mataupu.
Toe lomia i le faatagaga a le SamoaNews
