O le Aso Tofi talu ai faatautaia ai le Faauuga o Fanau Talavou o le Pasefika ua mataituina e avea ma taitai o talavou Pasefika mo le lumanai i Sini nei. O i latou nei pe tusa ma le limasefulu, mai aoga maualuluga eseese i Sini na taualuga ai i lea aso sa latou aoaoga faapitoa i auala ma aga e faamautu ma faalauaitele ai lo latou silafia i aganuu ma tu a o latou atumotu e tupuga mai ai i le Pasefika e pei o Fiti, Tonga, Samoa, Atu Kuki, Solomona, Maori ma isi atumotu.
O le aso foi lea na maimoaina ai measina o loo i totonu lava o le falemataaga (museum) a Ausetalia o loo i William Street i Sini, lea ua atoa le toluselau tausaga talu ai na aoina ma faalauiloa i lenei nofoaga.
Saunoa le alii pule o measina a le Pasefika i le falemataaga, se alii Maori ia Logan Metcalfe, o se avanoa lē maua gofie lenei e fanau Pasefika ua sauni atu e tauave tiute o taitai talavou mo le lumanai, talu ai le ‘oa ma le felanulanuai o nei faamanatu tāua ma le loa o tausaga o teuina e pei o laei faapasefika, siapo, meatau, tuiga, pate ma le anoanoai o isi measina.
O le taimi muamua foi lenei mo le tupulaga sa auai mo le silasila ile matagofie o faiva ma agavaa o tatou tuaa Pasefika na vaneina, lalagaina ma eleiina siapo ma ie anamua. O nisi o faatagata mai le atumotu Eseta ma Niu Kaletonia ma Vanuatu o loo i totonu o lenei faaaliga.
Na faafetai foi alii ma tamaitai faiaoga ile loto finau ma le fesilisili o nei fanau i o latou faasinomaga, ua taualuga ai i lenei sauniga faapitoa ile falemataaga.
Na vaaia foi le toatele o fanau Samoa lava ia na taulimaina o latou pepa faauu mai lenei aoaoga e aofia ai le tamaitai o Felisha Parker mai Granville ma Blacktown, Devana Fretton o Fairfield, Paul ma Michael Vitale faapea foi Nelesoni Mailei.
Sa auai foi le tamaitai o Mal Fruean o le NSWPC faapea le taitai polokalame ia Annie Rogers Nelson. Faailoa e sui talavou na faamanuiaina, o le tāua o lenei polokalame ma le oo atu i le Museum ua pupula ai o latou mata i measina a Samoa ma le Pasefika.
