“Ole manatu autu ua ‘au‘au iai le aso faamanatu o lenei tausaga o aiātatau. Ole valaauina o oe ma a‘u e tulai mai le aso lenei mo le faatāuaina ole aiātatau ale isi tagata”…Palemia
E lē o avea lagona tetee o nisi tagata ile mataupu o aiātatau e solomuli ai le Malo ile faatāuaina o aiātatau a tagata uma ole atunuu.
E tele itu tāua na afea ile saunoaga ale afioga i le Palemia susuga Tuilaepa L Sailele Malielegaoi ina ua ia tatala le aso faamanatu o aiātatau ma faailoa aloaia le suesuega ole a faia ele Komesina o Sulufaiga ile tausaga atoa o lumanai nei 2017, e suesueina ai sauaga i totonu o aiga.
“Ua talafeagai ma le agaga o lenei aso faamanatu le faalauiloaina aloaia ole taimi ua atofa e lagatila ai se uluai suesuega faapitoa tau aiātatau e lē gata i Samoa nei ae o atumotu foi ole Pasefika.”
“O lenei suesuega e faasino i sauaga i totonu o aiga ua avea ma se tu ma se aga faameaola e lē tatau ona tupu i totonu o Samoa e faavae ile Atua ole alofa mutimutivale”, na saunoa ai le alii Palemia.
Na ia faaalia foi ua mae‘a ona tali le Malo o Samoa ini fautuaga ale mau ofisa o itutino o Malo ole taupulega a Malo Aufaatasi e aofia ai ma le komiti faafoe tau aiātatau, le komiti ole tafiesea o soo se faiga faailoga tagata faasaga i tamaitai faapea le komiti ole puipuia o aiātatau o le fanau.
“O lona uiga ia amatamea i tatou taitoatasi uma lava e tutū faatasi mo le puipuia ma le faaaloalogia ma fesoasoani ile isi tagata soifua. Ua luitauina ai i tatou i lea aso ma aso uma foi e avea ma siamupini e leoleoa ma puipuia aiātatau ale isi tagata ne‘i solipalaina”.
“Ole fatu atoa foi lea o tulafono poo poloaiga a lo tatou Alii e pei ona tatou tausia ia tatou talitonuga faakerisiano. Ia aua ne‘i e manatu faapito ae ave le faatāua ile aiātatau ale isi tagata. E ao ina tatou manatua e tofu i tatou ma aiātatau, o ou mātua, o lou uso, lou tuafafine ma lou tuaoi”.
Ole tausaga ua mavae na faalauiloa ai le uluai lipoti ale Komesina o Sulufaiga ile tulaga oloo iai aiātatau o tagata soifua i Samoa. Ua faailoa i lea lipoti ni atugaluga faapea ni fautuaga e fofo ai le aafia o aiātatau o tina ma tamaitai faapea fanauiti e mafua mai i nisi o tu ma aga faasamoa aemaise o pulega i totonu o nuu ma afioaga.
Ole faasuafaina o tina ma tamaitai ole atunuu i suafa matai ose isi lea tulaga sili ona tautalagia i lea lipoti ona oloo tāmau pea nisi o nuu ile lē talia oni tamaitai e faaee iai ni suafa matai. O nisi foi nuu e lē talia ile saofaiga a matai ni tamaitai ua umia ni suafa matai.
