E to‘a 38 alii ma tamaitai ua faauuina nei e lē gata i le aoaoga ua faamautu ai le avea ma tausi soifua lesitalaina ae o isi ua avea ma tausi soifua faamauina.
O le numera lenei o alii ma tamaitai tausi soifua o le a laasia le isi maualuga i le tauaveina o o latou tiute o tausi soifua o le atunuu. E to‘a 33 ua faauuina e avea ma tausi soifua lesitalaina ae o le isi toalima ua faauuina nei e avea ma tausi soifua faamauina.
O se numera toatele peitai e pei ona ta‘ua e le afioga i le faauluuluga o le Matagaluega, le afioga i le Minisita, Tuitama Dr Talalelei Tuitama, o se numera e moomia lava le siisii pea pe a fuafua i le aofai o loo faia le tautua i le atunuu atoa.
O le taimi lenei na ia ta‘ua a fuafua i le faitau aofai o tagatānuu o Samoa ma le aofai o tausi soifua faamauina ma tausi soifua lesitalaina, e tusa ma le toatasi le tausi soifua i tagata e to‘a 500 o le atunuu, ma o se numera na ia faaalia e moomia le faaleleia ina ia mautinoa le atoatoa o le auaunaga ofo atu i tagata o le atunuu i le tausiga o lo latou soifua maloloina. O se galuega faigata ae o se galuega foi e pei ona ta‘ua e le alii Minisita e faavae uma lava i le alofa, poo le ā lava le faailoga ua umia.
O le tausaga atoa lea na faafoe ai tiute faatausi soifua o i latou nei i falemai eseese i totonu o le atunuu ma o iina na faaauau mai ai a latou aoaoga lea ua faaiuina i le tauaao atu i ai o o latou tusipasi ma faamautu ai le auaunaga ofo atu i le atunuu.
O le alii ofisa sili o le Matagaluega o le Soifua Maloloina, Toleafoa Leausa Dr Take Naseri na tufatufa atu tusipasi ma pine i tamaitai ma alii tausi soifua i le sauniga na faatautaia i le faaiuga o lenei vaiaso, ma le faafetai o lea ua iai le faaopoopoga o i latou e faatino lenei auaunaga tāua i totonu o le atunuu.
O le faamautu ai o a latou galuega i totonu o Samoa, o se faafetai lea a tamaitai ma alii tausi soifua na faauuina auā o le laasaga mulimuli lava lea e faia e le tausi soifua a o lei aloaia le auaunaga faatausi soifua i Samoa. Ua avea ai foi i latou ma sui tumau o le Asosi a Tausi Soifua i totonu o le atunuu.
Na faatumulia le nofoaga i Motootua na faia ai lenei sauniga i aiga ma uo o i latou na faauuina ona o le molimauina o lenei laasaga tāua i le soifua tautua o i latou ua faamanuiaina i lenei foi galuega.
