O le alii loia Aumua Ming Leung Wai (itu taumatau) ma le alii faamasino o le faamasinoga maulalo, Ameperosa Roma

O le alii loia Aumua Ming Leung Wai (itu taumatau) ma le alii faamasino o le faamasinoga maulalo, Ameperosa Roma

Ua lē taliaina e le Faamasino Sili le afioga Patu Tiavaasue Falefatu Sapolu, le finauga a le itu a le Loia Sili mo se faamasino mai atunuu i fafo, e seei i le faamasinoga o talosaga toe iloilo, e iloiloina ai le faaiuga a le faamasinoga faaitumalo, i le mataupu faasaga i le Peresitene o Faamasinoga o Fanua ma Suafa, le afioga Fepuleai Atilla Ropati.

O le vaiaso na tea nei lea na fofogaina ai i luma o le Faamasino Sili, mafuaaga ua manatu ai le itu a le Loia Sili e tatau ona aumai mai fafo se faamasino e na te iloiloina le faaiuga a le faamasino faaitumalo, lea na fai i le mataupu faasaga le afioga i le tamaitai faamasino Rosella Papalii.

O le mataupu lenei na tupu i le masina Tesema o le tausaga na tea nei, i se fiafia a le matagaluega o Faamasinoga, lea na tuua’ia ai le faaaogāina e le Peresitene o se auupega –fagupia e sasa ai le ulu o le leoleopo.

O le faaiuga a le faamasino faaitumalo o loo manino ai e leai ni faiga faasolitulafono na faatino e le Peresitene, ma na faaleaogaina ai tuua’iga faasaga ia te ia. Peitai na toe talosaga le ofisa o le Loia Sili, e toe iloilo ai le faaiuga, na talia e le faamasinoga, ma o le vaiaso na tea nei lea na iloilo ai e le Faamasino Sili se tasi o vaega o le talosaga toe iloilo o le aumai o se faamasino mai fafo na te iloiloina le mataupu.

O le tamaitai loia o Rexona Titi lea o loo tulai mo le itu a leoleo, o le finauga a lea tamaitai, e le amiotonu le toe suesueina lava e se faamasino Samoa o lea mataupu, ona o lē o loo aafia i le mataupu o se sui o le ofisa o faamasinoga. Saunoa foi Rexona e faaono aafia le faaiuga o le talosaga toe apili pe afai ae faatino lava e se faamasino Samoa le mataupu.

Peitai o le finauga a le loia o loo tulai mo Fepuleai, Aumua Ming Leung Wai na ia faaalia ai o se finauga ua ta’umaulaloina ai le galuega a le faamasinoga, o se finauga ua atagia ai le lē faatuatuaina ma le lē talitonuina o le galuega a le faamasinoga ma o se finauga e le tatau ona faaaogāina.

Saunoa Aumua “afai o se finauga talafeagai o loo finauina o lona uiga sa tatau foi la ona finauina se faamasino mai fafo e na te suesueina le mataupu a’o tagofia e le faamasinoga faaitumalo.”

O le faaiuga o le finauga, na saunoa ai le Faamasino Sili, e le faaaogāina le talosaga, ma o le a faatalia lana faaiuga tusitusia e faamatala auiliili mai ai le mafuaaga o lana faaiuga. Na tofia foi e le Faamasino Sili le afioga i le faamasino o le faamasinoga maualuga, Leiataualesa Daryl Clarke, e seei i le talosaga toe apili.

“O le a toe foi le mataupu lenei e suesue e Leiataualesa, o ia foi lea na muai suesueina lenei mataupu i le amataga, ma ua talafeagai le toe faasee iai e na te faatinoina le suesuega o le talosaga toe apili.”

O le taimi nei o loo faaauau pea ona malolo le tumau le afioga Fepuleai ma e lei toe taliu i le fale faigaluega le afioga i le Peresitene seia mae’a lelei suesuega i lana mataupu e pei ona finauina i luma o le faamasinoga. O le aso 16 o le masina fou lea e toe valaau ai le mataupu i le faamasinoga o talosaga ma toe iloilo ai loa le mataupu mo se taunuuga.