O le faaiuga o le tausaga lea na faalauiloa ai tuutuuga e taofi ai le toe faaaogāina o tupe tuai e pei o le 10 sene, 20 sene, 50 sene, $1 ma le $2. O le masina o Novema lea na faalauiloa ai tupe fou ua mae‘a ona gaosi mai i Ausetalia mo le faaaogāina i Samoa nei. E ui o lea e mae‘a le tausaga 2011 ae maua ai e le Faletupe Tutotonu e lei taitai mai i totonu tupe tuai, lea e aofia ai le $2 pepa lanu moana lea ua lē toe faaaogāina.
Ua gaosi le $2 auro e pei lava o tupe Niu Sila ma Ausetalia. O lea la ua toe tatala foi le vaiaso atoa lenei e faagasolo atu ai tupe tuai nei ae fesuiai ma tupe fou e le Faletupe Tutotonu o Samoa.
O le suiga tele lava o nei tupe e ese mai i le laiti atu nai i lo tupe tuai, o le itu lea o le ata o le Afioga Mamalu i le Tui Atua Tupua Tamasese Efi lea ua i le tupe fou.
Ua sui ai le ata o le Afioga Mamalu i le Malietoa Tanumafili II na amata mai ai lava tupe siliva ma tupe pepa o Samoa.
Faaalia e le Faletupe Tutotonu e tāua le toe faafoi atu o tupe tuai ona e lē tatau lava ona toe vaaia pe toe faaaogāina foi i fefaatauaiga a le atunuu ma o le vave ona faatino lea tulaga, o le vave foi lea ona iloa lelei le tupe e toe faafoi i fafo auā le gaosia o le tupe fou lea ua faagasolo nei.
Ua lē o toe iai ni ta‘i 5 sene poo ni sene kopa (copper).
O le mafuaaga lava o le suiga tele lenei ona na ta‘ua e le Faletupe Tutotonu e tele ai fua le tupe faaalu ae ua tau le faaaogāina. O Peretania foi sa gaosi ai le tupe tuai peitai o lea ua faatautaia mai nei i Ausetalia ona e taugofie atu.
E matua māmā lava le tupe siliva fou ua iai nei ma o loo toatele lava o tau faamasani i foliga fou ua iai le tupe a Samoa. Ona pau seleni ia o loo tumau lea foi e lei leva tele ona suiga o tupe lapopoa e pei o le $10.00 e oo atu i le $100.00.
O lea e lei atoa foi le lua tausaga o lega suiga i foliga o tupe pepa fou a le atunuu ma ua talia nei la le mae‘a o le vaiaso atoa lenei ona faamalosia loa lea o tapu i le faaaogaāina o tupe tuai.
