O le ala o le pule o le tautua. E lē fia aai le aiga auā e lava le tamaoaiga ma galue malosi, faatoaga, pa povi, moa ma meaitualo, o sosia ma manuia e mafai ona faia e soo se tagata pe a tuu atoatoa i ai le loto, agaga ma le mafaufau.
O le tau latalata i le faaiuga o le tausaga ua mavae, na faamanuiaina ai le susuga ia Pinofoaga Mativa Seupule o se alo ole atunuu e alala i Matautu Falealili ina ua manumalo i ni vaega tau faifaatoaga i le atunuu, lea na faatupeina ai e le Malo o Samoa lana faigamalaga i le atunuu o Saina.
“E tele naua le tamaoaiga i totonu o aiga i Samoa o iina e puna mai ai manuia pe a galue malosi,” o le saunoaga lea a Pinofoaga Mativa na faaalia ai i ona aiga le manuia na mafai ai ona ia vaaia le lalelei o le atunuu o Saina i se faamanuiaga a le malo o Samoa.
O le taliu mai o lana faigamalaga i Saina na a‘e ai se finagalo e tatau ona fai sina malologa ae asia mai aiga i Brisbane nei, lea na faimalaga mai ai i le masina o Tesema 2013. O le susuga ia Apineru ma Lisa Fetoai o le tausoga sa aumau ai i laua ma si ona uso i Kuiniselani faatasi ma le feasiasia‘i i ona auaiga e pei ona iai le susuga i le faafeagaiga Ekalesia Aso Fitu o le toe afio mai ia Pr Toetu ma le faletua ia Elei Faraimo ma nisi o le auaiga e iai le tina matua ia Asomua Filo Fetoai ma le nofoaalo.
Ua toe taliu i Samoa le faigamalaga i le po o le Aso Toonai ma le faamoemoe i le Atua e toe faaopoopoina pea le malosi e toe faia ai nisi atinae lelei mo le aiga aemaise ekalesia ma le atunuu.
