Ua maua e le aoga o le Loto Taumafai i Motootua se tasi o galuega mo le tapenaina o le toe pueina i Samoa o le ata faasolo a se televise i Amerika, lea sa pueina muamua i lo tatou atunuu i le tausaga e 2009.
E taunuu atu le tusitala i le aoga i le taeao o le Aso Lulu, 13 o Aperila 2011 o loo punonou mai nisi o alii talavou o loo a‘oa‘oina i le Loto Taumafai i le tomai o le ta ma le vaneina o ata i tino o ogalaau, i le faia o lea galuega i pou laau pe ta‘i 7 futu le uumi.
Na faailoa mai e se tasi o molimau faatuatuaina o le tasi lea o galuega ua maua e le Loto Taumafai, ma na faamaonia mai e se tamaitai ofisa o le aoga.
O lana faamatalaga ina ua fesiligia e $20,000 (lua-sefulu afe) le totogi o pou uumi a le au pueata o le Survivor o loo galulue ai le fanau o a‘oa‘oina lea tomai i le Loto Taumafai.
Ua lava lea molimau e faamaonia ai, o Samoa ua toe filifilia e pueina ai le Survivor, ina ua mae‘a taumafaiga ma sailiga i le pulega o Tagata Tafafao mo se faamatalaga e lē manuia.
Na pau lava le faamatalaga na aumai, o loo faia pea feutanaiga i le taimi nei ma i latou o taiulu i le pueina o le ata faasolo. Faaalia e le tamaitai ofisa o le aoga o le Loto Taumafai, ua mae‘a ona vaneina ma tusi ata o nisi pou ma ua momoli i le au pue ata, ae o isi pou na maua atu e le tusitala o loo galulue ai le fanau aoga. O se fiafiaga i le aoga mo fanau e iai manaoga faapitoa le avatu o lea galuega ua maua ai se seleni tele mo le faia o nisi atina‘e mo le a‘oa‘oina o fanau.
Ua faaalia e se molimau o le nofoaga i Falelatai sa pueina muamua ai le ata, o loo toe tapena mo le faaaogāina foi i le vaega o le ata o le a toe pue i Samoa.
Ua faaalia e se tasi o le auaiga o Haleck i Amerika Samoa i se lipoti a le leitio o le KHJ i Pago Pago, o loo iai se fuafuaga faapea e toe faaaogā le nofoaga o loo fausia ai le faletalimalo i Falelatai mo le pueina o le ata, peitai e lē mafai e lea sui o le aiga ona faalauaitele nisi faamatalaga ona o aiaiga ma tuutuuga ma i latou o loo pulea le galuega o le Survivor Samoa.
O le atunuu o Tonga sa ave lana ofo mo le avea o le motu o Vava‘u ma nofoaga e pue ai le ata, ae peitai ua lē faamanuiaina lea ofo ona e faapea e lē lava faletalimalo i le motu o Vava‘u e faaaogā e tagata e galulue i le pueina o le Survivor.
O le vaega o lea ata faasolo sa pueina i le atunuu o Nicaragua o le a maimoa e le atunuu i se taimi e lē o toe mamao i luga o le televise o le TV1 i Mulinuu.
