Toe foi mai Aukilani galuega faamisionare Autalavou Worship Center Otahuhu

O viiga lava o le Atua na pepese ma alalaga ai le autalavou Worship Center i Otahuhu ina ua molimau i le agalelei ma le faivavega o le Atua Soifua, a o feagai ai i latou ma le latou malaga faamisionare i Samoa i le tolu vaiaso talu ai. O lenei malaga sa agai ai mo a latou galuega faaevagelia i ni isi o afioaga e pei o Iva, Saipipi, ma Samalaeulu faapea ai ma aoga e pei o le Kolisi o Vaipouli, Kolisi o Mata ae Vave, o le Kolisi i Palauli atoa ai ma Upolu e pei ona iai le Kolisi o Avele, Kolisi o Leifiifi, Kolisi o Samoa atoa ai ma le Kolisi o Faleata. Sa maua foi le latou avanoa na asiasi ma faataunuuina ai a latou faaevagelia i le falemai i Tuasivi ma le toese i Vaiaata.
I le molimau a le susuga Mataio Mataia o se tasi o taitai o le autalavou, sa ia saunoa ai o se matua faamanuiaga lava i le latou aumalaga le galuega sa feagai ai. E le gata ina sa talia fiafia i latou e afioaga sa talai ai, ae sa tele lava le mamalu o le atunuu sa taliaina le faaolataga a Iesu Keriso. Na ia taua foi o se luitau tele mo le toatele o le autalavou ona o ni isi e vaivai i le gagana, ae sa agalelei lava le Atua ma foai atu le lototele e faatino ai le galuega. O le saunoaga foi lea a le susuga i le faafeagaiga ia Malaki Isaako ina ua faatalanoa e le tusitala, na ia saunoa ai o le latou malaga sa faamaonia mai lava e le agaga o le Atua a o lei tapenaina ma o le ala foi lena na o latou malaga ai ma le le masalosalo aua ua o latou talitonu o loo muamua le Agaga o le Alii e tapena le latou mulimuli atu.
Sa tutulu le faletua ia Rosa o le faletua lea o le susuga i le faafeagaiga ia Malaki ina ua ia tautino le fai vavega ma le lelei o le Atua. I lana saunoaga na ia saunoa ai, o mea uma lava sa o latou agai i ai e lei tuulafoaina i latou e le Atua. E le gata i lea ae o le suiga o le tau i le loloto o le malulu na malaga atu ai, ae taunuu atu feiloai ma le vevela o Samoa. E ui i ia suiga o le tau, ae sa leai ma se tasi o i latou na poia pe faataotolia i ni mai. Na molimau ni isi taitai o le autalavou ma o latou tautino ai le sinasina o le saito i laufanua lava o Samoa, ma o loo matua moomia pea galuega faamisionare e tusa ai ma le taliaina o Iesu Keriso e avea ma Alii ma Faaola i tagata.
I fuainumera tusitusia e tusa ai ma le lipoti a le aumalaga o loo faamauina ai e tusa ma le 2,075 le aofaiga o i latou sa taliaina le faaolataga ae le o faamauina ai le numera o le toatele sa molimau i ai. E tele ni isi tala mananaia o le malaga aemaise lava o taimi o a latou talaiga ae o le auga lava o le lelei o le Atua ma Lona fai vavega. O le taimi muamua lenei faatoa masii ese atu ai le autalavou Worship Center Otahuhu ma Niu Sila nei, ma o le amataga foi lenei o le latou galuega ua faataoto e pei ona saunoa i ai le susuga i le faafeagaiga ia Malaki.