E toavalu tamaitai ua faamautu nei oi latou ia ole a tauva e saili ai se Tausala o Samoa ole 2016 ile 2017. E toalua tamaitai mai Ausetalia, oe Miss Samoa Australia o Miriama Latu Meafou male tamaitai o Tayla Jane Scanlan ole Miss Samoa NSW.
E lē o iloa le mafuaaga ua toalua ai tausala mai Ausetalia ae e mautinoa ua talia uma ona o aiaiga oloo iai e talia soo se tamaitai Samoa mai fafo e fia tauva.
O isi tamaitai ole Miss Samoa NZ o Naomi Eta Fruean, ma tamaitai i Samoa nei e pei o Tina Kerisiano Moe, Abba Rose of Dinah Vaiaoga Ioasa, Priscilla Paleagese Finally Olano, Maria Elena Schuster Falepunaoa Maposua, ma Esther Timoteo. Oloo iai ile toavalu lenei se tamaitai mai Kanata ae e lē o faailoaina mai i faasalalauga ua amata faatino e faalauiloa ai tamaitai ole tauvaga tausala Samoa ole Teuila o lenei tausaga.
I tapenaga mole vaiaso ole Teuila o lenei tausaga lea ua faagasolo ile vaiaso nei e na ole 11 ausiva ua faaulu ma ua pa‘ū le aofaiga o ausiva o lenei tausaga pe a faatusa ile 20 na tauva ile tausaga ua mavae.
Oloo iai le talitonuga ona ua totogi le $300 tala e lesitala ai se ausiva ole pogai lea auā ole tausaga ua mavae na faaulu fua e leai se totogi. Pau foi le numera ae ole tauvaga manaia e na ole toaiva ua faaulu e faapena foi ile tauvaga o fuataimi e na ole toa sefulu.
Ua faaalia ese sui ole komiti ua mafua ona faaulu ile tupe ona o le fia faaleleia o faailoga aemaise ole faatupega o le polokalame. O fautasi e oo mai ile taimi nei e lima Sa ua ua ta‘ua mai ese sooupu ole a tutū e saili ai le siamupini o le Teuila ole 2016.
E lua fautasi mai Manono lea e lei faailoaina mai igoa ae o le isi tolu e aofia ai le fautasi mai Amerika Samoa, o le Littlerina ma le fautasi o le Tolotolo o Tama Uli mai Salelologa i Savaii. E 40 afe le faailogatupe o le fautasi e manumalo.
