Toafā faipule e ono mamulu nofoa i le Palemene

E toafā faipule o le Palemene o loo aafia nei i ni mataupu tau faamasinoga, lea o loo tele ina tuufesili ai le toatele, poo le a iai se aafiaga o tofiga faafaipule o i latou nei, pe afai ae faamaonia o latou moliaga o loo molia ai.
E aofia ai le Afioga Peseta Vaifou Tevaga, o le faipule o le Itumalo Faasaleleaga Numera 4, lea o loo molia i le avetaavale faatamala, na mafua ai ona oo le maliu i se tagata.
O le Afioga Toeolesulusulu Cedric Schuster, le faipule o le Itumalo A‘ana Alofi Numera 3, o loo molia i le auai i taupulepulega na mafua ai ona poloka e nisi o le afioaga o Satapuala se vaega o le aualatele agai i le malaevaalele i Faleolo.
O le Afioga Muagututagata Peter Ah Him, le faipule o le Itumalo Sagaga le Usoga, sa faamaonia mai talu ai nei e le Faamasinoga Maualuga moliaga faasaga ia te ia, lea ua mae‘a ona lau le iuga faatasi ma ni sui o le Koluse Mumu.
O le Tofa Levaopolo Talitonu Afoa Vaai, le faipule o le Itumalo Gagaemauga Numera 2 na tulai i le vaiaso talu ai i le faamasinoga, i le mataupu i le pusa oloa lea na aumai ai le uta o ni fagu uisiki ma tufatufa atu e aunoa ma le uia o auala faaletulafono o le auina atu o nei oloa i totonu o le atunuu.
I le feiloaiga a tusitala ma le afioga i le alii Palemia i le vaiaso na tea nei, na fesiligia ai e le autusitala i sona finagalo, peitai na faaalia e le Taitai o le malo, e leai sona manatu, ona o loo tāua ia te ia mau o le talitonuga faakerisiano, e “aua le faamasino atu ina ne‘i faamasinoina oe.” O le mataupu i le faipule o Gagaemauga Numera 2, Levaopolo Talitonu Afoa Vaai, na faaalia e le Palemia, lona faafetaia o Levaopolo i lona foi sao tele i finauga faaupufai, i ona tiute o se faipule o le Itu Agai.
I lalo o tulafono tumau o loo aiaia ai faaiuga a le Fofoga Fetalai, e faasino i se faipule e aafia i se aulape, ma afai o ni mataupu e oo i le Faamasinoga, e soloia ai lava le nofoa o se Itumalo o loo umia e sea faipule.