O taumafaiga a le faalapotopotoga o le Samoa Ala Mai o loo tapenaina sui tauva tamaitai mo le palota tele a le atunuu, a itiiti mai e to‘a 28 tamaitai ua mautinoa o le a tauva mai i itumalo faafaipule o le atunuu.
Peitai ua faaalia e se sui o le faalapotopotoga o le Samoa Ala Mai, e siitia lea numera ona o loo galulue pea e faia polokalame faalauiloa e unaia ai tina ma tamaitai e faatāua lo latou tulaga auai i upufai o le Malo e ala i tofi faipule o le Palemene.
O le tasi o sui tauva tamaitai mo le itumalo o Alataua i sisifo le afioga Taatiti Visekota Peteru o le a tauva ma le tofi faipule o loo iai nei o lea itumalo le tofa Lafaitele Patrick Leiataualesa, peitai e iai ma nisi sui o le a tauva mo lea itumalo ae e lei faamautuina poo ai i latou.
I taumafaiga a le Samoa Ala Mai o loo faia ai ni mafutaga faaleaoaoga mo tamaitai o le a tauva e faamalamalama ai itu uma e ao ona mulimulitaia ia latou sauniuniga, ina ia taofia le aafia o nisi i le solia o aiaiga o le tulafono o faigapalota.
