Ua faapaleina nei le sui na lagolagoina e le Soleen Florist e avea ma manaia o le uluai tauvaga o le Perenise o le Tausaga. Na faataunuuina lea faamoemoe i le faaiuga o le vaiaso ma o se sailiga tupe mo faalapotopotoga e pei o le Toomaga mo ē Puapuagatia e faimeaalofa atu ai i le atoaga o le 10 tausaga o lana auaunaga i Samoa atoa ai le maota o tina ma tamā matutua i Mapuifagalele.
O le alii e suafa ia Timothy Perefoti Komiti o le alo o le faafeagaiga o le Ekalesia Metotisi i Matafele lea ua avea nei ma Manaia o le uluai tauvaga o le sailiga o se Aloalii o le Tausaga. O lenei tauvaga e toaono i latou na tauva ai ma e lima ni vaega o le tauvaga na tauva ai.
O le Laei Aloalii poo le Prince Wear, o le Lavalava, Taleni, Alo‘a ma le Taliga Fesili. E lua faailoga na faamanuiaina ai le alii o Timothy, o le Laei Aloalii ma le Alo‘a. O isi faailoga e tolu na maua e le alii o Michael Jonathan Leelo lagolagoiga e le My Girls Club.
Na faaalia e Komiti lona agaga fiafia ina ua avea o ia ma uluai Aloalii o le Tausaga. Na ia fautuaina foi tupulaga o Samoa ina ia faaaogā lelei o latou olaga e fesoasoani atu ai i ē o loo manaomia le fesoasoani.
O lenei tauvaga o le galuega alofa lea a le tausala faafafine 2014-2015 o Tusitafu Su‘a, mo Faalapotopotoga o loo manaomia le fesoasoani, ma o seleni na maua i lea faamoemoe o le a faasafua i ia faalapotopotoga.
O le pale mai ai o Gustaf poo Tusitafu e pei ona silafia ai ua ia manatu ai i lenei tausaga ina ia faia se tausinioga faapenei ma le manatu a mafai e tamaitai ma faafafine ona faia tauvaga faapenei e tatau foi ona mafai ona faatino e le itupa o alii. O le toatele o nei alii e aooga o loo i totonu o Iunivesite ma o nisi o ni alii o loo aofia i nisi o ausiva i totonu o le atunuu.
O le alii ua manumalo e galue i le Matagaluega o le Soifua Maloloina ma e fiafia tele e siva ma o le tasi lea o auala ua faaaogā ai lana taleni o le unai lea o le Zumba i polokalame faagasolo a le Soifua Maloloina ua faapea ona oo atu ai i afioaga ma ua pue foi i luga o televise mo le faamalositino e faia i aso taitasi e le mamalu o le atunuu.
Ta‘ua e Komiti a mafai ona faaaogā le siva e faalalo ai le toto maualuga, le suka ma isi faama‘i lē pipisi ua aafia ai le toatele o le atunuu i lenei vaitaimi, ua aogā lana taleni mo le atunuu.
E pei lava le faagasologa o lenei tauvaga o le tauvaga e saili ai le Tausala o Samoa auā na alu le lua vaiaso o asiasi nei alii i nofoaga e pei o le lotoā o le Toomaga mo ē Puapuagatia atoa ai le nofoaga o tamā ma tina matutua i Mapuifagalele ma na faia ai ni galuega toe faaleleia ma faamamā ai nei nofoaga mo fanau sulufai atu mo se fesoasoani i Tuanaimato atoa ai tamā ma tina matutua i lo latou maota o loo i Vailele.
O le faamoemoe e pei ona lagolagoina ai e le faletusi o le Samoa Stationery and Books (SSAB) ina ia avea lenei taumafaiga ma polokalame faaletausaga ma o le maota o le EFKS i Mulinuu na faatautaia ai le faaaliga tele mulimuli e filifili ai lē e manumalo.
