Tele masalosaloga i le mu o le Tusitala Hotel

Fai mai nisi o le au faigaluega a le faletalimalo o le Tusitala, o uaea eletise na mafua ai le mu, ae o se isi alii ofisa sinia na ia faaalia, e masalosalo lava e iai se sootaga o feteenaiga sa aliali mai i le va o le au faigaluega ma le pulega fou, ma le tulai mai o le mu.
O lona uiga e foliga mai i lea molimau e pei na faatupu e se isi le afi ua faaumatia ai nei vaaiga matagofie o maota Samoa tetele, o fausaga faaanamua sa fai ma mataaga i turisi ma tagata tafafao mai fafo.
Poo le ta o le sefulu o le taeao o le Aso Lulu, aso 16 o Setema 2009 na tupu ai le mu ma nanati atu ai loa loli a le vaega fuimu e faatino le latou tautua o le tapeina o le afi ma taumafai e faasao mai nisi o meatotino taua ma aoga.
O le vevesi a loli fuimu ma le pisi solo o alii ma tamaitai o le aufaigaluega e faatino le fesoasoani, sa le mafai ona faaitiitia ai le sasao ae o le afi ona o le malosi o le matagi ma le savili mai Saute i Sasae.
E atoa ane le itula o fai galuega fesoasoani ae molimauina ua le mafai ona faasaoina le maota tele lea e lata mai i le auala, sosoo atu ai ma le isi maota i le pito i uta, ae o loo taamilo ane le afi i le maota o iai le umukuka ma le vaega e taumamafa ai ma faatamai.
Na molimauina ai foi le gaioiga a le fuimu, e ese taimi e faia ai aoaoga ma faataitaiga i gaioiga e tatau ona fai pe a tupu se mu tele, ma le tulaga na iai le latou galuega i lea aso.
Ua tele leo ua auala mai ai faatonuga ma ua fememeai ai ma le au faigaluega poo fea a faalogo i ai.
Na pau le ‘afu o le uu o le faagaau ma faapasī atu le vai i le mea o loo sasao ae ai le afi.
Na faamaulu mea mānava a nisi tamaitai fuimu ma tauave a latou fagu okesene e mānava ai, ae sei o i totonu i le vaega o loo sasao ane ai le afi, peitai na feei atu i ai nisi alii o le ofisa e toe foi ane i afaina se soifua ua malosi le sasao o le afi.
E vevesi tagata e fui le mu ae vevesi ai ma nisi sa matamata ma maimoaina lea faalavelave e talai pusa faigaluega a le au kamuta o se konekarate o loo galulue i le faafouina o le faletalimalo, ma gaoi mea faigaluega.
Ua savavali au iliafi, o samala ma ili laupapa lapopoa faapea ma isi mea faigaluega taua.
O le vai na faaletonu e fai ma pe atu le sapalai autu i paipa tetele o loo i se vaega o le taulaga, ma o le tasi lea mafuaaga o le tuai ona mate le afi.
E lata ane i le sefulu i le aoauli ua tau maua se toa i le sosolo a le afi ma faasaoina ai na o se vaega o loo iai potu o le faletalimalo i le itu i sisifo faapea ma potu i le pito i tua.
O loo faia nei suesuega a leoleo ma le vaega o le fuimu, ma e le o iloa se taimi e maea ma iloa ai le mafuaaga o le afi.
O se taimi ona faailoa mai lea e le YP Reddy Group ua pulea nei ma umia le faletalimalo se isi fuafuaga o le latou taumafaiga, ma o le a iloa ai le isi laasaga o le a oo i ai le Tusitala Tanoa Hotel.
O le masina o Novema sa faamoemoe e toe tatala ai le faafouga atoa o le faletalimalo peitai ua tomua i mala le faamoemoe.
O Iulai o le tausaga nei na tauaao aloaia atu ai i le YP Reddy Group le pulea o le faletalimalo ina ua tuua e le Kitano Company mai Iapani le pulega o le Tusitala.
E toa sefulufitu le aufaigaluega sa faatotoe e faaauauina le auaunaga i le Tusitala Tanoa peitai ua faaletonu nei galuega ma leiloa poo fea o le a faamoemoe i ai.