Tele le sailigatupe mo atina‘e a le Taupulega

E lei iai lava ni faalauiloa poo ni faatosina i le sailigatupe a le Faalapotopotoga o Pisinisi a Samoa i le vaiaso na tea nei, ae mae‘a ane le latou sailigatupe e silia i le $22,000 le latou tupe na ao.
O le tupe lenei ua fuafua e agai i se faalapotopotoga e feagai ma le ofo atu o tupe auā atina‘e ua una‘i e le tupu tamaitai, le faauluuluga o Malo o le Taupulega.
E tusa ma le to‘a 240 i latou na auai atu i lenei sailigatupe ma na aofia ai le alii Palemia lea na saunoa i le tāua o lenei sailiga seleni.
“E taua ona o le fesootaiga o Samoa ma le Tupu Tamaitai, ae e tāua atu le mafuaaga o lenei sailiga seleni, ina ia alu tonu ia i latou ua manaomia se fesoasoani,” o le saunoaga lea a le Alii Palemia. O se faalapotopotoga e lē o toatele latou te silafia ae o Samoa o se tasi lea o atunuu o Malo o le Taupulega, atunuu sa iai se fesootaiga ma pulega a Peretania i tausaga ua mavae poo nisi o loo iai lava lea faauluuluga mai i le Tupu Tamaitai i le     O le Faalapotopotoga la o Pisinisi ma Atina‘e i totonu o Samoa lea e tofia lona Taitaifono, Namulauulu Sami Leota e taitaifono i le lala o lenei faalapotopotoga i totonu o Samoa.
O le sailigatupe o se aiga na faatautaia ma e totogi ai tupe mo le taumafataga aemaise o meainu.
O le teugatupe ua faaigoaina o le Teugatupe o le faamanatu ai o le 60 o tausaga o le nofoaiga a le Tupu Tamaitai, lana Maiasetete Elisapeta II.
E lua lelei lava atina‘e ua agai i ai le fesoasoani o le tupe lea na aoina. O le saili o auala e togafiti ai tagata e mafai ona fesoasoani i le faaletonu o le latou vaai, ma atina‘e e mafai ona una‘i ai le tupulaga talavou aemaise i latou e matuā iloga lava le tulai mai i atina‘e ma taitaiga i totonu o soo se atunuu o le li‘o lea o Malo o le Taupulega.
E toatele i latou e aafia le vaai ona o faalavelave ma o le vaega muamua lea o le taumafaiga i lenei sailigatupe ina ia saili uma auala e mafai ai ona taofi le tulai mai o faaletonu e te‘i lava ua tauaso ai nisi ae e lē tatau ona oo i lea tulaga.
O le vaega lona lua ua vaavaai ai e talosaga atu tama ma teine talavou i le fesoasoani lenei auā le seleni e mafai ai ona una‘i a latou atina‘e aemaise o a latou taumafaiga mo se lumanai manuia. E tatala foi le avanoa lenei i tama ma teine o Samoa. O le taulai ina ia mafai e a latou atina‘e ma galuega ona fesoasoani i isi tagata soifua.
O le $22,400 lea na maua i le sailigatupe lenei o le a mafai ona faaluaina e se faalapotopotoga e ta‘ua o Atina‘e i Peretania, o loo aofia uma i le taumafaiga lenei o le Teugatupe i le faamanatu ai o le 60 tausaga o le nofoaiga a le Tupu Tamaitai, Elisapeta II.