E lei iai se manatu o alii e toafā o loo molia i le faia o se osofaiga i le lala o le faletupe o le Westpac i Vaitele-tai i le amataga o Aperila 2010, o le a talitualimaina lo latou naunau e fia maua ni loia e totogi e le Malo e tauaveina a latou mau i le faamasinoga.
E atagia le faateia o i latou i le lūlū o o latou ulu ma savavali ese mai ma le pa sa tutulai ai, ina ua mae‘a ona faailoa i ai le teena o a latou talosaga mo ni loia e totogi e le Malo.
Ua sauni nei la aiga o ia alii e toafā e aofia ai Shane Sione Chan Tong, Faiga Victor Tanielu, ma Robert ma Nazario Chong Nee, ina ua teena a latou talosaga sa tuuina atu i le Matagaluega o Faamasinoga mo se fesoasoani e totogi ai e le Malo a latou loia.
O le toatasi o ia taulelea le alii o Shane Sione Chan Tong na amata mai le valaauga o o latou moliaga ua iai lana loia lea o loo tulai ai Patrick Fepuleai, ae sa ave lava lana talosaga e totogi e le Malo.
O le teena ai o lea fesoasoani mo i latou ua latou faailoa ai i le faamasinoga ina ua toe tutulai i le vaiaso na te‘a nei i luma o le Faamasino Sili, o le a taumafai lava le tagata ia ma lona aiga e totogi a latou loia. Ua toe ave le isi avanoa e saili ai ni loia a Robert ma Nazario Chong Nee, faapea faiga Victor Tanielu ma e tatau ona oo atu i le aso 31 o le masina nei lava pe a toe valaau o latou moliaga ua iai ni a latou loia.
Na vaaia le lūlū o ulu o nisi o nei taulelea talavou ina ua faailoa e le tamaitai loia o loo tauaveina le itu a leoleo, le teena o a latou talosaga mo ni loia e totogi e le Malo.
E tasi le moliaga o le faomea ua molia faatasi uma ai nei alii, faaopoopo i ai ma moliaga o le umia o ni aupega e pei o le laau malosi ma se agaese, ae iai isi moliaga o le a toe faamanino atili e le itu a leoleo pe a toe fofogaina lenei mataupu i le faaiuga o le masina. Ua taofia pea i latou i le vaaiga a leoleo.
E lei tuuina atu ni a latou tali i moliaga uma ua molia ai, ona na faaalia e le tamaitai loia mo le itu a leoleo o Precious Chang, e iai moliaga na faaulu e leoleo i le faamasinoga faaitumalo le District Court, o loo taumafai e fofoga faatasi uma ma le moliaga o le faomea i le Faamasinoga Maualuga.
E iloa lea tulaga e pei ona faailoa e le tamaitai loia pe a toe tutulai alii e toafā i le aso 31 o Me 2010.
