(Aoga Tulagalua Henderson South ma Lincoln Heights)
O le faiga paaga ma le faigauo a aoga tulagalua a Henderson South ma Lincoln Heights, na amata mai i le tausaga e 2012 seia oo mai lava le taimi nei o loo faaauau pea.
Ua 3 ai nei o tausaga o faagasolo pea lenei mafutaga i alo ma fanau Samoa o loo aooga i totonu o nei aoga, ae lē gata i lea o susuga i faiaoga Samoa o loo aoaoina fanau.
O le autu ma le faamoemoe o lenei faatasiga ia maua pea le naunautaiga ma tumau le filigā o tamaiti i le aoaoina o le gagana Samoa aemaise o le faatāuaina ai pea i mātua lo latou taumafai malosi mo le aoaoina o le tatou gagana. O se tasi o faamaoemoe maualuga o lenei faiga paaga, e lē se faiga tauvaga ae o le manatu ia faafiafiaina alo ma fanau i nei polokalame Samoa o loo aoaoina ai.
O le Aso Lulu la o le vaiaso ua mavae 3 o Setema na toe faataunuuina ai lenei tauvaga i le hall a le aoga tulagalua a Henderson South i le 9:30 i le taeao. E 3 vaega na vaevaeina i ai lenei tauvaga. 1: Vasega 0, 1 & 2; 2: Vasega 3 & 4; 3: Vasega 5 & 6.
A o lei amataina le polokalame na muamua lava i le sauniga lotu na taitaia e le susuga ia Maiava Elu mai le Ekalesia Metotisi i Grey Lynn. O luitau ma faamalosiau a le taitai na faatatau lava i le tāua o Measina a le atunuu, ma o le manulauti foi lena sa tatai i ai mafaufauga o le fanau e ala i lenei faamoemoe.
O le faletua ia Maninoa Maiava Elu sa faafeiloaia le mamalu o mātua aemaise susuga i puleaoga o aoga e lua o loo faatautaia lenei polokalame. Na vaaia le toatele o mātua na agai atu i le fia faalogologo i nei taumafaiga o loo iai alo ma fanau laiti, mai le 5 tausaga e oo atu i le 11 tausaga le matutua.
O le Autu o lenei tauvaga o “Measina a Samoa.” O le Vasega 0,1 & 2 e toasefulu tamaiti na tauva ai, o le Vasega 3 & 4 e toavalu sui tauva, ma le Vasega 5 & 6 e toavalu foi tamaiti sa tauva.
Sa fefiloi lava le faiga o le tauvaga, i solo ma tauloto ma lauga, e lei faatapulaaina foi le uumi, ae o le mea sili ona tāua, o le faaaogāina e le fanau o le gagana a Samoa e pei ona putiputi i ai le atunuu.
O faamasino o le tauvaga o le afioga ia Su‘a Tipi ma le afioga ia Aiono Lafaele. Na saunia foi e le fanau ni pesepesega e tovā ai le faamoemoe o lea aso.
O le faletua ia Malaeniu Auvaa o le aoga a Henderson South o ia lea o loo faauluulu i ai lenei Bilingual Samoa i le itu i Sisifo o Aukilani faatasi ai ma le fesoaosani a le faletua ia Maninoa Maiava ma Koreti Schwalger.
O le aoga a Lincoln Heights o loo faatautaia e le faletua ia Mata Leota ma Simotu Lavea. O le polokalame foi o lea aso na toe faafofoga ai le auvalaaulia i sui e toalua o Henderson South le alii o Sosene Toelau ma Auega Esau sa auai atu i le tauvaga lauga a le Fagasa sa faataunuuina i Otara ma le tauvaga a Niu Sila atoa lea sa faatautaia i Ueligitone i le aso 1 o Aukuso. E maeu foi le taumafai o fanau laiti i le faatāuaina o le aganuu a Samoa.
Na faaiu le faamoemoe o le aso i le tufatufaina o tusipasi a tamaiti sa tauva ma le saunoaga faafetai a le susuga i le alii pule o le aoga tulagalua a Henderson South i faiaoga o aoga e lua aemaise o mātua i le lagolago i polokalame a le fanau, ma faia ai loa ma le taumafataga auā se faamalositino o le aso.
