E faapea nisi o laina o le Afioga Paia a le Atua, afai e ‘au Ieova ma le tagata, o ai se faasagatau mai? E ui lava ina iai le fili i soo se mea ma taumafai e faavaivai lana fanau faatalitali, peitai sa lei mafai ai ona manumalo pe taofia se mea lelei e faia mo le Atua.
O le po o le Aso Toonai aso 6 o Novema, sa fuafua mamao mai ai auā se tauvaga tele o le CA (Christ Ambassador) a le Ekalesia AOG ua lauiloa i le New Hope Ministries Brisbane.
O le ‘auga lava o aute ma le manatu maualuga, ina ia faateleina ai pea le viiga o le Atua e ala i pesega, o tala faaevagelia faapea siva faaleagaga.
O lea ekalesia o loo tausia e le susuga i le faafeagaiga ia Pastor Laulu ma le faletua ia Losa Situlia.
O le ta‘ita‘i o le CA o le susuga ia Toalei Pouoa. E lua ni ‘au poo ni teams sa vaevaeina i ai lea CA, o le Team 1 – Feagaiga Tuai (taitai-Faamaoni Kaleti) ma le team lona 2 o Feagaiga Fou (taitai-Fonofili Moananu).
Sa muamua ona momoli laau i fogaa ma sii mea i Matautusa, o le viiga lea sa siitia e le ta‘ita‘i o le Ekalesia aoao i Brisbane le susuga i le toeaina ia Pastor Alaivanu Toma. Sa molimauina le faatumulia auā sa tele ina auai uma nisi o ekalesia a le AOG i totonu o Brisbane.
Na faagasolo polokalame uma e pei ona tapenaina e le ekalesia ma na vaaia le tau fai pati o le aumaimoa i le agavaa ma le mataalia o nei teams e 2.
Sa faia le galuega a faamasino ma tulai mai ai le team a Feagaiga Fou i le tulaga muamua, ma o latou tauaaoina ai se ipu (trophy) sa tauaaoina lea e le faletua ia Va Toma (faletua o le toeaina ia Alaivanu Toma).
Na saunoa lana auauna, e lē o le ipu ae o le agaga faafetai i le atoatoa o tapena e saga viia ai pea le Alii. Sa faaiuina i se taumafataga ma luluaao ai loa le auvalaaulia ma faatofa. Malo le tapena i lau susuga i le faafeagaia Ps Laulu ma le faletua ma le ekalesia malosi!
