E fa‘i o le pisi i le manava ai o galuega a o le faataalise atu o le faitau fia o tagata maimoa i le tatalaina o le Ipu o le lalolagi i le taaloga o le Tag Rugby i North Shore i le vaiaso na se‘i mavae atu.
E ui i lena pisi ae na faataunuuina lava fuafuaga o le tatalaina o ia taaloga. Tusa o le ‘afa o le ono i le afiafi o le Aso Lulu na se‘i mavae atu na faatumulia ai le North Harbour Stadium i le sauniga o le tatalaina o ia taaloga.
O se vaaiga felanulanuai ma le matagofie e faatusaina e pei ua toe vaaia taaloga i le Apia Park. Sa faatasi ai i lea aso mātua o le toatele o alo ma fanau sa tofia mo ‘au a Samoa i ia taaloga.
O se vaaiga louloua ma le mamafa o timuga i le afiafi lea, ae sa faatino lava tulaga masani i aganuu faa-Maori ona faaauauina ai lea o isi tautalaga faapitoa o le aso mai le Peresetene Aoao o le taaloga Tag Rugby Federation, e faafeiloai ma faafetai ai i ‘au i le finau mai i lea taamilosaga.
Na mae‘a tautalaga faapitoa ona alo loa lea i faafiafiaga mo ‘au sa auai. Sa vaaia i ia foi faafiafiaga le toatele lava o alo ma fanau a Samoa sa nafa ma faafiafiaga o le aso, mai lava i tamaitai faapea foi alii, ma o se vaaiga faafiafia loto foi lea ina ua pati le toatele i le matagofie tele o ia faafiafiaga.
O le afioga ia Aiolupotea Ofisa Tonuu o ia sa tofia faapitoa e tauaveina le tagavai o Samoa faatasi ai ma le siiina a‘e o le Fu‘a o Samoa faatasi ai ma isi atunuu i le taimi na sisiina a‘e faatasi. E tusa ai ma se lipoti lata mai e faapea, na manuia le taumafaiga a Samoa i le tele o tauvaga aemaise le tulaga tutusa ma Niu Sila i se tasi o tauvaga o ‘au sinia i lenei lava taamilosaga.
Masalo o le isi Ipu o le lalolagi o le a siitia ai foi le tulaga o Samoa e faatusa i nisi o atunuu ua leva ona latou faatinoina lea taaloga. Tatou te faafetaia ai le finau o alo ma fanau a Samoa i nei taaloga ma le faamoemoe o le a aogā foi lea avanoa se‘i tau vaai pe ono siitia ai ai le silafia i le lumanai i lenei lava taaloga.
