Taunuu ona tatala Malumalu Katoliko Mulivai Apia ia Tesema

Ua faamautinoa mai e se sui o le Ekalesia Katoliko, Father Ioane Ono, o loo talafeagai fuafuaga o le faatinoga o le galuega, ma le faamoemoe o le a oo lava ona tatala ma faaulufale le malumalu i le masina o Tesema e pei ona faatulaga ai.
I le faigata o nei aso i sailigatupe e fausia ai ni atinae tetele ma taugata e lē gata i nuu a o ekalesia, ae e ui ina faapea e iai le au tetee ma le au fai manatu i ni galuega o le a fuafua, ae ua tatou masani i uiga o o tatou tagata, e tiga ona faigata se galuega ae e iu lava ina maea.
O lea ua molimauina le matagofie o le tulaga ua oo nei i ai le galuega o le toe fausia o le malumalu o le Ekalesia Katoliko i Mulivai i Apia, e pei ona ua pipii iviivi ma ua tino mai ai i le vaai ua lalata ina faatini foe o le galuega o loo feagai nei ma lea ekalesia.
Ta‘ua e le sui o le ekalesia, e iai le faamoemoe o le aso 8 o Tesema ua tatau ona faamae‘a lelei ai le galuega pe a fua i le tulaga ua iai le galuega i le taimi nei.
Ua amata foi la ona faagaioi fuafuaga uma mo le faaulufaleina o le malumalu fou, e ui e lei fia faalauteleina e le alii faifeau poo ā uma fuafuaga ua faatulaga.
Pau le itu na ta‘ua e le sui o le ekalesia, ua iai se komiti faapitoa o loo nafa ma le faamaopoopoina o tapenaga o lena aso tāua.
Ta‘ua e Father Ono, atonu ua leai se usugafono a talavou o le ekalesia i le fonotaga tele a talavou o le lalolagi (The World Youth Day) lea e usuia i Brazil i le masina lenei, ona o le fono lea sa tatau ona faatoa usuia i le tausaga fou, peitai ua toe tuu mai i luma i le tausaga lenei, ae ua lē fetaui loa ma fuafuaga a le ekalesia i Samoa, ona ua tele alaga‘oa a le ekalesia o loo moomia i le galuega tele o loo faagasolo. E faitau miliona le tau o lea Malumalu tele o loo i le taulaga o Apia ma o loo tagiilima le tele o fuafuaga i le itu tau tupe o loo fausia ai le malumalu.