Tāua le polokalame mo tuuaga o aoga a le Vili’s Boxing

E maeu lava foi le tulaga sa oo i ai le taumafaiga a le alii o Ofisa Vili ma lana kamuapni o le Vili’s Boxing, i se polokalame sa faatulaga mo le fanau a o malolo ai mai tuuaga o aoga.
A o agai atu le fanau mo le toe amataina o aoaoga mo le tausaga nei 2010, ae sa faamaea ai foi ma se polokalame sa tuufaatasia e lea alo o le atunuu ma lana kamupani.
E lua vaiaso sa faataunuu ai fuafuaga a le susuga ia Vili mo tama ma teine, a o lei toe taliu atu mo aoaoga amata o lenei tausaga.
O polokalame mo malologa o aoga, sa faia e aofia ai ni taaloga o talanoaga ma felosipi a le fanau, o se vaega sa taua e le susuga ia Vili, na matua aoga tele e faatumu ai taimi o tamaiti, a o feagai ai ma malologa.
E le gata i lea, o se avanoa lelei foi e tapenapena ma sauniuni ai mafaufau o le fanau mo nisi luitau fou e agai ma taulai i ai faatatauga i lenei tausaga.
O gaioiga uma sa faataunuu e aofia ai ma taaloga, o ni faataitaiga aogā tele, e faagaioi ai mafaufau o le fanau a o toe sauni atu mo le taua o le mafaufau.
E silia ma le selau alo ma fanau sa auai i lea foi tapenaga matagofie, ma sa faataunuuina i le hall i le lotoa o taaloga netipolo i Browns Road i Manurewa.
E lei faapito lenei polokalame mo na o alo o Samoa, ae sa faasafua mo alo ma fanau a soo se atunuu lava.
Sa vaevaeina i ni vaega se lua, ma sa fai faatauvaga foi le faagasologa o taaloga uma ma fuafuaga sa faia. O le Aso Faraile na tea nei sa auai atu ai le Samoa Times mo le faaiuina o lea taumafaiga, ma molimauina ai le matagofie tele ma le lava tapena o le faauluuluga o lea foi polokalame, le susuga ia Vili.
O se tasi o itu lelei sa molimauina i lea aso o le vaaia o le vavalalata tele ma le lelei o fesootaiga faaleuo a le susuga ia Vili, ma alo ma fanau uma sa auai.
O se tulaga sa maitauina, ma e matua taua tele lea aua o se tasi lea o faatosina aoga ma le taua mo le mafaufau o le tama ma le teine, ina ia tuuina atoa i ai le faamoemoe ma le lagolago e ala i le gauai ma faalogo.
O le faaiuga o le polokalame, sa tufatufaina ai foi ma tusipasi mo tamaiti uma sa auai i le amataga e oo mai lava i le faaiuga.
O le tasi lea o faailoga e atagia ai le tapena lelei ma le lē fai mea faapaole o le susuga ia Vili ma le kamupani.
E le gata sa amanaia le fanau e ala i tusipasi na tufatufaina, ae na faapea foi ona iai ma se ipu tele sa faaautu i ai, ma tauia ai le au manumalo ma le finafinau.
O le taualuga o lea aso, na fiu le fanau e aai i le barbeque tele ma inu le tele o vai suamalie na saunia lava e le susuga ia Ofisa ma le aiga, faapea le kamupani sa lagolago malosi i le faamoemoe.
Ua maea foi ona faataoto le fuafuaga alualu mamao a le susuga ia Vili ma lana vaega, o le a toe faaauauina lea lava polokalame mo le taimi muamua e malolo ma tuua ai aoga i le kuata muamua, poo le masina o Aperila o le tausaga nei lava.
Taua e Ofisa, e leai se faavaivai e tapena ma sauni nisi polokalame se tele, pe afai e vaai pea ma le alofa i le gasolo atu o le fanau ma faatumu ma faaaoga lea avanoa taua mo i latou i taimi e malolo ai aoga mai kuata taitasi o le tausaga.