E ui ina ua motu mai ma le taula, ae susue pea le faamalama ma manatua le faasinomaga na soifua ma ola a‘e ai. O sailiga malo a le paia ma le mamalu o le atunuu e faatino i tautua eseese.
I le aai o Melepone ua toatele tamalii o loo tautua i alaleo eseese i la tatou gagana Samoa auā le faafofoga tapuai a tupu ma tamalii, tapaau ma tulatoa, tainane faletua ma tausi, le malosi o ekalesia ma nuu aemaise o tuaa sinasina o loo tapuai i maota ma laoa ma aiga.
Peitai o lea ua siitia aso ma itula faafofoga o le atunuu i la tatou gagana faapelepele i luga o peau ma galugalu o le ea, ina ua tatala aloaia le tautua a le Voice of Samoa Saili Malo 1503AM i le Aso Toonai, aso 12 o le masina nei o Setema.
O le susuga i le faafeagaiga taulagi Rev Faiumu Pio Faletuai o loo faauluulu i ai lenei auaunaga malosi, lea ua tautua mo Samoa i aso e 6 o le vaiaso, faatasi ma le lagolagosua a nisi o tamalii iloga i faasalalauga le fetalaiga ia Luai Tony Tuimauga, susuga ia Taupau Sione, Ps Apouani Unasa ma le tiakono ia Tavita Osa.
O le sauniga na faapaia ai le auaunaga na taitaia e Ps Apouani ma saunoa faafetai ma momoli le faamalo ona o le finagalo saili malo o tupu ma tamalii e pei ona ua ula ma asoa ai nei i le faaeaea ua maua.
Malo tau malie toa, o outou māmā na! Sagai ane ‘ai o le tai ma faalautele e Ieova lo tou valaauina. Manuia le tautua mo Samoa.
