Ua amata le tausaga i galuega faasao a le Matagaluega o Punaoa Faalenatura ma le Siosiomaga. O se nofoaga ua faafailele ai nei laau e aogā mo le taofia o le solo o le palapala lea na tatala i le vaiaso na tea nei i Apia.
O se nofoaga ua faatupe e le Matagaluega atoa ai se fesoasoani a le lala o atinae a Malo Aufaatasi le UNDP i lalo o se polokalame e faatupe ai atinae ua ta‘ua o le GEF poo le teugatupe o le siosiomaga a le Lalolagi.
I Samoa lava ia ua iai nofoaga o loo maua ai vaitafe ua matauina le tele ina aafia i taimi o lologa ma ua solo ai le palapala ona o le tele o galuega ua faatino e le tagata ua aafia ai nei nofoaga.
O lea la ua toe unai le toe totō lelei o nofoaga nei i augutu o vaitafe ina ia mautinoa le taofia o le solo o le eleele i taimi o tafega.
E lei leva atu nei foi i le mamafa o timuga o le vaitaimi o le Kirisimasi na vaaia ai foi le enaena atoa o le gataifale o le taulaga ona o tafega mai i le Vaisigano ma o iina e iloa lelei ai le tele o le palapala e solo ona o tafega ma le tetele o timuga. Sa solo foi le eleele i atumauga o Solosolo ona o ia timuga ma o isi ia itu o le atunuu i le atu Anoamaa ua molimauina ai pea le tele o le eleele solo, ma o popolega lava ona o nofoaga maualuluga nei e ifo mai i le alatele ma e ono aafia ai femalagaaiga ma taavale i taimi e mamafa ai timuga ona o lea faaletonu.
O laau la nei ua amata ona totō i le nofoaga ua tatala nei o loo iai le faamoemoe ina ia mafai ona tufa atu i afioaga o loo iai vaitafe mo le totō ai ma ia faasao ai nei nofoaga ua tele ina aafia o latou siosiomaga i lenei vaitaimi.
O le faaaliga a le Matagaluega, ua taumafai lava ina ia taofiofi le solo o le palapala, ma o le tele o laau e totō i nofoaga ua ma‘ale‘ale i le taimi lenei, o le tele foi lea o le fesoasoani i le taofiofia o kasa oona mai i le sao atu i le siosiomaga auā e apoia e laau le kasa o kaponi (carbon dioxide) e sao i le siosiomaga.
O se taumafaiga foi ina ia saga unai le faasao o eleele o Samoa e ala i le faaauau ona totō o laau ma e fesoasoani tele i tagata o afioaga ia laau aemaise lava i le umi ona iai o le palapala lea e faigofie ona solo i le mamafa o timuga ma tafega.
