Na tu’itino le au faipisinisi faleaiga ina ua le toe faatagaina a latou pisinisi i le maketi fou ua iai nei i Fugalei. O le maketi sa iai muamua sa iai ma faleaiga, peitai e tele faafitauli sa aliali mai ai ma lamatia ai le saogalemu o le soifua maloloina o le atunuu e tausasami ai.
O le mafuaaga lea na tasi ai le finagalo o le Malo ma le Faalapotopotoga o Taui o Faalavelave Faafuasei e pulea le maketi i Fugalei, e le toe faia ni faleaiga. Peitai ua faaalia e le Minisita o Taui o Faalavelave Faafuasei le afioga Lautafi Fio Selafi Purcell, e lei muta kle agai atu pea o le au faipisinisi fai faleaiga e fia maua so latou avanoa.
Na faia ai loa le faaiuga a le kapeneta e faatino le fausia o se nofoaga i autafa o le maketi e faatutu ai ia pisinisi.
E fa masina na faatino ai le galuega ae nao le iva faleaiga ua mafai ona ofi ai i le nofoaga fou le food court. Faaalia e le Minisita ua le mafai ona tali manaoga o tagata na talosaga atu ona ua manatu le faalapotopotoga ma le Malo o le a tau ina amata i ia faleaiga e iva ae o se taimi i le lumanai o le a saga silasila pea iai le Malo.
O le toe iai o se nofoaga e iai faatasi ni faleaiga o le toe tepa lea i tua i le nofoaga sa iai faatasi ni faleaiga i le fanua sa iai le faleoloa o Molesi i tausaga e lei mamao tele atu. O se nofoaga sa tumutumu iai le atunuu peitai ina ua tala ese le nofoaga ina ua fau le fale fou o le NPF Plaza ua iai nei, na molo’aua atu ai lava ma se nofoaga faapea.
O lea la ua toe iai nei ma ua vaaia foi le tumutumu iai o le atunuu e tausasami ai.
E tasi le miliona tasi le selau afe le tau o le food court ua iai nei i Fugalei.
Ua faaopoopo atu lea auaunaga tau pisinisi i faleoloa laiti ua fausia i totonu o le maketi i Fugalei faapea poloka ua iai faleoloa e maua ai meataulima ma lavalava e pei o ie ma ofu elei.
O lea la ua toe atoa uma auaunaga sa iai muamua ao lei talaina i lalo le maketi sa iai muamua, ae fausia le maketi fou ua iai nei i Fugalei.
