E silia i le $500,000 tupe Samoa le tau o le faleaoga fou o Satitoa ua mae‘a ona fausia ma umusa, ma ua sauni fanau a le afioaga e ulufale i ai ma faaaogā mo a‘oa‘oga.
O le faleaoga tuai sa tu i le aai, na nutililii ma salalau tasi i sauaga a le galulolo ia Setema 29 o le tausaga ua mavae 2009.
O le ekalesia Papatiso aoao i Niu Sila o loo tapuai ma galulue ai nisi o tagata Samoa faapea nisi o le afioaga o Satitoa ma Lalomanu na taulamua i le sailia o se fesoasoani e faatupe ai le faleaoga.
“Ou te faafetai i le Atua ua faaiuina ma le manuia le galuega, ma o se faafetai foi i le ekalesia aoao ona o le lima mafola ua mafai ona tino ai le galuega, ma taunuu le miti”.
O le finagalo lea o le susuga i le Faifeau toeaina o le ekalesia Papatiso Samoa i Niu Sila, Faasoo Auvaa i se feiloaiga ina ua taunuu le au malaga i Apia a o lumanai le umusaga o le galuega.
O se galuega na faaalia e le toeaina na tuu atoa i ai mafaufauga o taitai o le ekalesia aemaise le susuga i le faifeau o Paul o ia lea e nafa ma le vaaia o seleni o le galuega.
O le Malo o Niu Sila e $75,000 tala Niu Sila lana fesoasoani i le faleaoga ae o le ekalesia Papatiso e $175,000 tala Niu Sila lana foai, faaopoopo i ai ma le $75,000 tala Niu Sila mai le faalapotopotoga o ia fesoasoani i mafatiaga ona o mala faalenatura a le ekalesia Papatiso.
O seleni uma ia na tuufaatasi ma amata ai loa le galuega, e lē gata o le faleaoga ae o le suaina o le fanua mo le malae taalo. Na molimauina le sagisagi ane o paia maualuga o le afioaga i ona paia faalupe ma le au faigaluega a le Atua ina ua umusa ma tatala le galuega.
O le aumalaga foi a le ekalesia Papatiso mai Niu Sila faapea Ausetalia sa vaaia le faatumulia i le agaga o le fiafia ona ua tino mai le miti sa moli talosaga ai i le Matai Sili ia oo maia le aso e silasila atu ai sulu o le tino, ua tu le failā ma vaai tino i le faleaoga sa naunau e fausia mo alo ma fanau o Satitoa.
O le afioga i le Peresitene aoao o le ekalesia mai Niu Sila sa auai ma saunoa foi i le agaga fiafia e faatupe le fesoasoani.
O le Sui Palemia afioga Misa Telefoni na saunoa e tatala le galuega ae o le Pule Sili o le Matagaluega o Aoga a le Malo, Galumalemana Nuufou Petaia na ia ooti le lipine e tatala aloaia ai le faleaoga fou tulagalua.
Na faasopolia uma le mamalu sa auai i faaaloaloga masani faaleaganuu sa saunia e le afioaga. Na faalauiloa ai foi e le Sui Palemia le ofoina mai o ni avanoa sikolasipi e le Iunivesite o Massey i Niu Sila mo alo ma fanau o Samoa.
O ia avanoa sikolasipi na tauala mai ona o se tasi o alo ma fanau a Samoa o le lotu Papatiso o loo faiaoga i lea iunivesite le susuga Ben Penita Taufua.
O ia foi sa lagolago malosi i le alii faifeau o Paul sa vaaia le itu tau tupe o le galuega.
