Ua leva ona finau o tatou tagata faipisisnisi i Samoa e suesue ma saili se avanoa poo se faitotoa e ono aumai ai a latou oloa e faatauina i Niu Sila, auā ua tele taleni ma ua tupu foi le atamai i o tatou tagata e fausia ma gaosi ai le tele o a latou oloa, ae pau le lave ma le mafuaaga, ole leai ose avanoa e ono auina mai ai i atunuu i fafo mo le mamalu ole atunuu oloo alala ma papaaao i Niu Sila ma isi atunuu ole lalolagi. Ae ole agaga faafetai ma le pepese fiafia ole aufaipisinisi i Samoa ina ua matala mai le faitotoa mo tatou tagata e ala lea ile tautua ma le auaunaga ale Sei Oriana poo le SSAB lea oloo iai nei le latou lala fou i Magele ile Maota o Samoa.
Ole maua ai e o tatou tagata faipisinisi o lea avanoa ma ua maitauina ai le fiafia o o tatou tagata Samoa oloo i Niu Sila nei ua maua se faleoloa Samoa ua mafai ona faatauina ai lava na o oloa Samoa ma taumafa e auina sa‘o mai lava i Samoa. Ole mafai ona faatauina o oloa mai Samoa i Niu Sila nei, ole a fesoasoani tele lea ile siitia ole tamaoaiga i Samoa.
Ole afiafi ole Aso Tofi na tatala aloaia ai le faleoloa lenei i Magele ma sa tumutumu ai le mamalu ole atunuu i uo ma ē masani aemaise o faauluuluga o kamupani oloo mafai ona galulue faatasi ma le SSAB i Samoa.
Ole susuga ile faafeagaiga ia Makisua Fatialofa mai le Ekalesia AOG i Napier na ia tatalaina lea faamoemoe ile sauniga, ona sosoo lea ma le saunoaga autu mai le afioga ile Konesula o Samoa ia Faolotoi Reupena Pogi, lea na ia faafetaia ai le saili malo ma le silasila mamao ole faletua ia Fiti Leung Wai ma le aufaigaluega auā se manuia o o tatou tagata faipisinisi i Samoa.
Ose faleoloa muamua lea ua iai i Aukilani ua mafai ona aumaia ni oloa faapenei. Na saunoa foi le tamaitai pule ile faafetaia ole alofa ole Atua ona o faitotoa ua tatalaina mo lenei auaunaga, faatasi ai ma lana faafetai ile Konesula o Samoa faapea le Komesina o Fefaatauaiga ia Fonoti Lafitai Iupati Fuatai ile lagolago ma le fesoasoani i lenei taumafaiga. Na sosoo ma le ootiina ole lipine ele afioga lava ile Konesula, ona tatala aloaia loa lea ole faleoloa auā le maimoaga ale atunuu.
E maeu le felanulanuai o oloa eseese ua maua i totonu ole Sei Oriana ma ua faaalia ai foi le lima lelei ma le tele ole meaalofa oloo i o tatou tagata i Samoa. Oloo maua ai lavalava mo alii ma tamaitai, seevae, o meataulima e pei o taulima mo tina ma tamaitai, o tusi faitau mo fanau aoga, faapea tusi faalupega, o tauaga, salutu, faapea taumafa e pei o keke saina, pepa chips, siamupopo faapea apa peepee, ma le tele o isi oloa oloo mafai ona gaosi mai Samoa.
Ole tele o nei oloa oloo mafai ona filifili mai kamupani eseese ile atunuu aemaise lava iai latou oloo gaosia meataulima ma faatauina ile flea maketi, ma oloo silasila foi le pulega a lenei kamupani ile lelei atoatoa ole oloa e ono tatau ona auina mai ai i fafo. E toasefulu le aumalaga ale SSAB na malaga mai auā le tatalaina o lenei faleoloa, ma e toatolu i latou lea ua faamoemoe e galulue ai i lenei pisinisi iinei i Aukilani.
O lenei pisinisi oloo iloa lana tautua i Samoa ile igoa ole SSAB ma e tolu ona lala i Upolu, tasi i Savaii, tasi i Tafuna i Tutuila ma le tasi lea ua tatala i Aukilani.
Ua ese mai la le igoa lea ua faaigoaina ai le pisinisi i Aukilani, le Sei Oriana ona ole manatu ole pulega, o oloa oloo faatauina ai o oloa mo teuga faapea ni oloa mo meaalofa, auā o Samoa ma Tutuila e tele i oloa siiatoa ma tusi faitau.
O nei fuafuaga uma ose faitotoa na maua mai ina ua faamanuiaina ma filifilia le faletua ia Fiti Leung Wai ise faailoga mai le Palemia o Niu Sila ua faaigoaina ole Fellowship Award lea sa mafai ai loa ona talatalanoa ile Konesula ma le Komesina o Fefaatauaiga ise auala e ona auina mai ai oloa a o tatou tagata i Niu Sila nei, ma o lea ua tau ai lau ole faamoemoe ma ua iai nei le faleoloa Samoa i Magele, le Sei Oriana.
