E talalasi le aogā o le taleni pese aemaise o le taimi muamua na maua ma amata ai, o le tele lava na amata pepese i viiga o le Atua i aufaipese a ekalesia, o nisi na amata i faili o faafiafiaga i siva ma fale kalapu, o nisi foi na amata ma maua le taleni i aufaipese faalogologo o tautua i leitio ma televise e ala i CD.
O nisi na amata pepese mai aoga, a o nisi na maua i le toaga e a‘o le siufofoga ma faasolo ai ina iloa pese ma faaauau ai o se taleni. E faapena foi se lagona o le alii o Jay i lana taleni pese ua faamanuia ai le Atua i lona soifua. E ui ina iloa pese ma manaia le leo, ae maualuga lona talitonuga o le taimi atofaina e le Atua ma lana faauuga lea ua mafai ai ona faaiuina lona taumafai.
O le afiafi o le Aso Toonai na tea nei na matuā faatumulia ai le hall o le faleaoga a le pitonuu o St Albans i tauaiga, uo ma ē masani aemaise o le mamalu lasilasi o Samoa na afifio atu e molimau ma lagolago i le tatalaina ma le faalauiloaina o le uluai CD o pesega na fatuina lava e le susuga ia Jay Neilsen.
O le faili malosi a le New Band na feagai ma le aso faapitoa i saasaaga a le valaaulia, ae o le taumafataga felanulanuai na nafa lava ma si ona aiga.
O le kamupani puepese a le JJ Recording Studio a le susuga i le faafeagaiga ia Faatasi Sanerivi ma le faletua ia Irene na feagai ma le galuega fita i tuga o le tuufaatasiaina o le lipine. E maeu le matalasi o le siufofoga o lenei alo o le atunuu. O ona mātua o le susuga ia Lima ma le tina ia Leta mai afioaga o le Aai o Fiti ma Satitoa, ma na faaalia foi so la agaga faagaeetia mo si o la alo.
E momoli atu ai foi le agaga faafetai tele Samoa i lo tou titi fai tama na matagofie ai le faamoemoe, o loo i le Atua lo tou taui. Mai le ofisa o le Samoa Times Melepone, Ia aoga lau taleni mo le Atua Jay maua le malosi e tautua ai nai ou mātua ma le aiga, aemaise lau ekalesia.
