Ua faatulaga mai e le matagaluega o Femalagaaiga a Niu Sila, le masina fou, le masina atoa o Aperila o lenei tausaga, 2013, e amata ai ona tatala le avanoa mo talosaga a i latou uma o i atunuu o le Pasefika, lea o loo agavaa e talosaga mo ni avanoa e nofomau ma galulue ai i Niu Sila.
O tagatānuu Samoa, Tonga, Kilipati ma Tuvalu, lea ua maua foi avanoa i lenei tausaga e talosaga mai ai, amata i le aso 1 e oo i le aso 30 o Aperila.
I se pepa o faamatalaga mai le ofisa o le Immigration New Zealand, o loo ta‘ua ai se fautuaga mai le pule o mataupu tau femalagaaiga i faaitulagi o le Pasefika/Amerika, le susuga Alan Barry e faapea, e tatau ia i latou uma e agavaa e talosaga mai, ona faamautinoa lelei, ua atoatoa ona latou faatumu mea uma o loo moomia atu i le pepa talosaga, ma mea foi e manaomia ona aumai faatasi ma le pepa faatumu mo le talosaga.
Saunoa le alii pule, e tatau i tagata o loo faia le talosaga, ona tusi uma i lalo igoa o tagata o lona aiga totino lea o loo fuafua e aofia faatasi i le talosaga o loo fai. E tatau ona faia faapea, auā afai ae manuia le latou talosaga i le se‘i, o le a faigofie ai mo le ofisa ona iloa tonu le aofai o tagata o le a iai i le pepa faatumu mo nofoaga e nonofo ai.
Afai e lafo i le ofisa le pepa talosaga, o le a toe text atu pe imeli atu foi le ofisa e faailoa atu o lea ua latou maua le tou talosaga, ona taofi mau lea e le tagata o loo talosaga lana numera (Client Registration Number) e toe siaki mai ai le latou talosaga, pe a uma ona fai le se‘i ia Iuni.
E leai se tau e totogia mo le talosagaina o se avanoa i le Samoa Quota, ae $70 tala Niu Sila e totogi e tagata o isi atumotu pe a talosaga i le (Pacific Access Category).
Ae mo ē sa talosaga muamua, e na o le $30 Niu Sila e latou te totogia pe a toe talosaga i le tausaga lenei.
O le tulaga masani lava, e maua ane sau pepa talosaga i le lālā o le ofisa o femalagaaiga a Niu Sila i Apia, Nuku’alofa ma Suva, pe a oo i le aso e amata tatala ai le faiga o nei talosaga.
Mo i latou o loo faaaogā le initaneti, e mafai ona maua se kopi o le pepa faatumu, pe a agai i le www.immigration.govt.nz
