Ole Aso Faraile na mavae atu nei na valaaulia ai le autusitala i Sini ma faauluuluga o Malo, atumotu Pasefika ile potu faapitoa ole faletifaga ole Events Cinema i Parramatta le ‘Gold Class’ mo le molimauina o ata faaemo o ata tifaga Pasefika mataina ua faailoaina ile vaiaso nei i Parramatta ma Campelltown.
O nei ata i lalo ole faaaliga ata Tifaga Pasifika 2016 o ni galuega maoa‘e na fafauina, tusia ma pueina e tamafanau ale Pasefika ma ua sauni atu nei mo le silasila ale lalolagi atoa i soo se atunuu ole lalolagi.
Ose avanoa e lei maua ile luasefulu tausaga talu ai ae peitai o lea ua iai lenei laasaga ma le faitotoa mo tatou tagata talenia ile faiata tifaga faavaomalo. Ole tamaitai ia Kalo Fainu le faatonu ole polokalame e aumau i Sini na faafeiloai le aofia ise malu ole taeao faapea se puegaata ma le valaaulia.
O nisi o sui o malo Pasefika na auai e aofia ai le Konesula ole malo o Fiti ia Zarak Khan, Peresetene ole Fono Aoao a Tagata Samoa i Sini, Leilua Jerry Uesele faapea le Taitaifono ole Fono ale Pasefika i NSW, Malamie Fruean.
Sa tauaaoina foi ele komiti ni ato meaalofa mai le Pasefika e faamanatu ai lenei laasaga fou mo sui uma na valaaulia. Ise vaaiga i ata faaemo na maimoaina ose tulaga maualuga ua ausia e nei sui faiata tifaga ale Pasefika ma e tatau ona maimoaina e tatou tagata lenei faamoemoe ma maofa ai i tala mai le Pasefika ma mea o tutupu i o tatou aiga, nuu ma atunuu ua faaliliuina nei i ata tifaga ma faamalieina ai le silasila.
Ole Aso Lulu nei, 2/11/16, ole po muamua ma ole a faaalia ai le ata o ‘Being Bruno Banani’ ose alii talavou mai Toga na ausia se matatia ma ofi atu ai i taaloga ole Olimipeka ile malulu ile 2014 ma tuu ai Toga i talafaasolopito ile taaloga ole ‘luger’ poo le faasee ile aisa.
Ole Aso Tofi, 3/11/16, ole ata Maori ole ‘Poi E, te Mana o te Moana’ ole tala ile mafuaaga ole pese ma le uiga ole Poi E, lea na fatuina ile 1984 ma avea ai ma pese numera tasi i Niu Sila ma le Pasefika e oo lava ile lalolagi atoa.
Ole Aso Faraile, 4/11/16, ole ata ole ‘Little Coconuts’ e autu ise tamaitai Samoa ia Memoana Schwenke e alala i Sini nei, sosoo ai ma le ata ole ‘Vanuatu Women’s Water Music’.
Ole Aso Toonai, 5/11/16, ole ata ole ‘Sons of Halawa’ ma le ‘Little Coconuts’, ‘Being Bruno Banani’. O ata mo le Aso Sa, 6/11/16, ole ‘Talanoa Shorts’, ‘Mercenary’, ‘Yumi Go Kale’.
Ma ose avanoa lelei e maimoa ai o tatou tagata ma silasila ile maualuga ua iai le tomai i ata tifaga o fanau Pasefika ma unaia nisi tupulaga ia tuliloa lenei taleni.
Ata Tifaga mo Brisbane
Aso Tofi, 10/11/16
Being Bruno Banani, Sons of Halawa
Aso Faraile, 11/11/16
Belief, In Football We Trust
Aso Toonai, 12/11/16
Talanoa Shorts (short films), Poi E,
Being Bruno Banani
Aso Sa, 13/11/16
Little Coconuts, Mercenary,
Tales of Oceania, Poi E,
