E maua taimi ae faigata ona maua avanoa faaauro faapenei e tatalaina mai e le Atua. E agi lava le matagi o le afiafi o le Aso Sa, 24 o Aukuso, na faia ai le sauniga e tatalaina ai le lālā e lua i ai lālā o le Aoga a le “Ia Malamalama Agape Bible College” ma resitala ai suafa o i latou ua sauni e ulufale atu i le A‘oga faale-Tusi Paia i le aai o Logan City.
Sa taitaia lava e le Pule a‘oga le susuga ia Dr Peniamina Williams. Pei ona silafia o lenei a‘oga ua tele sona aogā e pei ona faatomaiina ai nisi o le atunuu ma atili mausali ai lo latou silafia o le Tusi Paia, aemaise le fesoasoani sili ona tāua e tapena ai le soifua auā le galuega a le Matai i soo se vaega ua valaauina ai e le Atua e pei foi la ona toe tatalaina ai le isi lea lālā. Ua toatele i latou ua sauni atu e tau le taua o mafaufauga auā foi ni faailoga taualoa o le suesueina o le Afioga a le Atua ma o upu lava o le Tusi, “E leai se mea e faigata i le Atua.”
O le uluai A‘oga na tatalaina o loo faauluulu lava i le susuga ia Ps Feddie le sauniga lea na faataunuuina ai i le afiafi o le Aso Sa, na tauaao aloaia ai e le faletua ia Jahnkie le Tusipasi e faamaonia ai ma tatala ai le lālā i Logan City, auā o nisi nei sa a‘oa‘oina mai le uluai a‘oga lenei: Pule a‘oga – Dr Peniamina Williams; Peresetene o le lālā i Logan City – Ps Fereti Purcell; Sui peresetene – Poulava Sam Mata‘utia; Failautusi poo le Resitala – Faueā Terry T. Faueā; Teutupe – Amataga Imo.
