Ona o le pisi tele na mafua ai ona lē maua se taimi e faamanatu aloaia ai le 10 tausaga a le kamupani a le Runik sei vagana ai a latou faalauiloa ma pa‘ū faapitoa na faia i nai vaiaso ua tuanai.
E ui lava la i se pisi tele, peitai pei lava o se avega mamafa i le mafaufau o le alii pule ia Pei Niko ma le aiga ona e tele ni meaalofa e fia tufa mo le mamalu o le atunuu i le lagolago malosi i la latou tautua.
Na saunoa Pei Niko e lē o se naunau lava i se sikuea peitai ona o le agaga alofa i paaga masani aemaise lava nai tina ma tamā matutua o nisi o i latou e tuuasiasi atu lava i taeao o Aso Lulu pe ua tai taunuu le Samoa Times.
E le gata i lea o se po fiafia e eva ai ma le atunuu ae tainane le feiloai atu ai i le tamaitai pule o le ata o le Silamanino faapea le tamaitai o loo autu i ai le ata o Silamanino ua aave ona itu e fia o le lalolagi i le lona matagofie i le maimoa ma le saunia lelei faapea le talenia o i latou o faatinoina.
O se uluai taimi lenei i totonu lava o Brisbane ua mafai ai ona auai mai se faauluuluga o se ata tifaga e momoli se agaga faafetai i nisi o kamupani ma le atunuu i lenei itu ona o le lagolago atu ma le fesoasoani.
Na tatalaina le po fiafia i le saasaaga faa-Samoa a le aumalaga ia Eliza Su‘a ma le tamaitai ia Verona Parker ona faagasolo lea o polokalame o le po. O se po mataina na atofaina i le afiafi o le Aso Faraile, aso 8 o Aukuso. E lei ofi le nofoaga masani a le Acacia Ridge Hotel i le lolofi atu o le atunuu e fia lagolago.
Na faamalieina le eva a tagata uma sa auai i lea po i le matagofie o tapenaga uma, sa faatofutofusia ai le aofia i le keke o le 10 tausaga o le Runik Polynesian Town. O soo se augatupulaga sa auai i lea afiafi e oo lava i tamā ma tina matutua sa lagona lo latou agaga fiafia ma tulimatai e fia feiloai atu i le pulega a le ata tifaga lauiloa o le Silamanino.
O le tofa ia Taua‘i Ponesi Su‘a sa faafeiloaia le aofia ma avea ma fofoga o le po ma vaavaalua ma le afioga ia Pei Niko Burgess. E tele faaailoga na tufaina fua i lea afiafi faapea le faalauiloaina o tautua i totonu o Brisbane, sa saunoa manino i ai le tamaitai pule o le ETV Production, Eliza Su‘a-Hunt, o ia o le Faatonu o le kamupani pue ata e pei ona silafia.
Na maua foi se avanoa e saunoa ai le tamaitai o autu ai le ata le tamaitai ia Verona Parker, na o laua faalauiloa e tatau ona oo atu i le vaega 10 auā o lea ua silafia ma lauiloa o Enoka ua moomoo i ai tamaitai Tokelau a o lea foi ua iai le masalosalovale o le alii o James ia Dave talu lona iloa atu o la talanoaga ma le tina o lona afafine ae o lea ua tuu atu lona faamoemoega ia Silamanino.
