O le Aso Gafua o le vaiaso nei (taimi Samoa) o le a aumai ai se iuga a le Faamasinoga Maualuga i ni alii talavou sa aooga i le Don Bosco i Alafua na aafia i se vevesi a nisi o aoga maualuluga i le atunuu i le tausaga e 2008, ma mafua ai ona aafia le tamaitai o Francella Tuala sa aoga i le Kolisi o Leififi i ni manua tuga mai se pomu fagu karasini (Molotov cocktail bomp).
O loo nofo taofia nei alii talavou o Joseph Ionatana ma Komiti Ene i le vaaiga a leoleo, ina ua faamaonia o la moliaga o le faaoomanua tuga (grevious bodily harm) e faatali ai le faaiuga mo i laua.
O Joseph sa molia i le taumafai e faaoo le oti i le tamaitai o Francella, ma le faaoomanua tuga. O ia foi o loo tuuaia e leoleo e pei ona folasia i molimau ua mae‘a ona fofogaina sa ia uu le pomu fagu karasini ma togi atu i le vaega na iai le tamaitai na aafia.
O le alii o Komiti Ene sa avea ma tama ulu poo le head boy a le Don Bosco i le tausaga na tupu ai le faalavelave. Sa molia o ia i le faufautua, tau faaosooso ma le fafauina o le gaioiga e faaoo ai le oti i le tamaitai na aafia. Na molia foi i le faaoomanua tuga.
Peitai o le mae‘a o iloiloga a le laulau o faatonu na le mafai ai ona faamaonia le taumafai e faaoo le oti, ae na o le moliaga o le faaoomanua tuga. Sa finauina e le tamaitai loia o Rosela Papalii sa tulai mo Komiti Ene, e tatala pea i tua le taulealea e faatali ai le aso o le faaiuga.
Na faavae le finauga a le tamaitai loia i le usitaia e Komiti o aiaiga na tatala ai i tua a o faatali le suesueina o le mataupu, ma le isi itu e iai si ona afafine lua tausaga, aemaise e manaomia e le loia le faigofie ona fesootai i le alii o Komiti mo le tapenaina o le lipoti faanofo vaavaaia. Peitai sa lulu le ao o le alii faamasino o Justice Slicer ma ia faailoa i le faamasinoga, e ao lava ona taofia pea i le vaaiga a leoleo i laua uma ua molia.
E fitu tausaga le faasalaga maualuga o le moliaga o le faaoomanua tuga pe a faamaonia i le faamasinoga.
O le faaiuga o le a aumai, o se feau taua lea mo alo ma fanau o le atunuu o loo aafia pea i vevesi e mafua mai i le va o fanau aoga poo taaloga foi.
O le lua vaiaso talu ai na molia ai e leoleo se tama aoga o le Kolisi o Sagato Iosefo, ona o se vevesi na aliali mai i le taulaga o Apia lea sa aafia ai ma nisi o le kolisi o Leififi. Peitai ua faamanino mai e le Matagaluega o Aoga a le Malo, e le o se vevesi na mafua i taaloga lakapi a aoga, ae o se vevesi na mafua i le va lava o le tama aoga ua molia ma se tasi o tamaititi o le kolisi o Leififi.
