Tapenaga mulimuli a David Tua mo le fusuaga o le senituri

‘O le malosi, ma le faamaoni e toleni, e o faatasi ma le tatalo i le Atua, e manuia ai le taumafai ma le faamoemoe i le fusuaga o loo vavaai atu iai’.
O le saunoaga manino lea a le tofa ia To‘aletai Tavita (David) Tua, ina ua feiloai ma le Samoa Times.
Sa fiu lava e tau fafau ni fesili e tau tatai mai ai le finagalo o le susuga ia David Tua i le lagona sa taumafai e fesiligia ai ina ua feiloai atu iai, ma le lagona ina ia tatala mai ai sona finagalo faaali agai i le fusuaga o loo fatalitali nei i ai le toatele, peitai sa tumau pea lona toafimalie ma le filemu, ma ia faapea mai ai,
‘O ia lava ia o loo fai pea lana matafaioi o le troleni malosi, ma faamaoni e tuu i ai le loto, faatasi ai ma le tatalo atu i le Atua, o lona talitonuga o lona manumalo lena.’
E taunuu atu le tatou nusipepa i le aoauli o le Aso Tofi o le vaiaso talu ai, ae ua maea toleniga mulimuli a le sususga ia Tua, sa faataunuina i lona lava fale toleni i Onehunga. Peitai i lea lava taimi, sa maua ai loa se avanoa e fesiligia ai, i le tulaga o loo iai ana tapenaga, aemaise ai o le tele o le mau faamatalaga ua faalele nei e le pulega ma le alii fusu o le isi itu.
O le fusuaga o le senituri e pei ona faaigoaina ai. O lea talanoaga sa matua tautino ai ma faaali e Tua e faapea, e leai, leai lava sona manatu faamaualuga e na te fuaaoina ai lana paga, le alii o Shane Cameron, peitai o le manumalo o le mealilo e teu i totonu o le loto, ma e iai lava le taimi e aliali mai ai i fafo ona tali ai lea o le tele o fesili, ma faamatalaga ua faalele.
O lona lava lea talitonuga mai lava i le uluai taimi na fuafua mai ai le faamoemoe, e oo mai lava i le taimi sa fai ai le talanoaga.
Sa molimauina le suiga tele ua iai nei le tulaga i le tino o le alii fusu ia Tavita, poo le tofa ia To‘aletai, pe a faatusatusa atu i le taimi muamua ma isi ana taaloga sa feagai ai.
Sa faapea foi ona fesiligia i lea vaega, ae sa ia ia taua o le manaoga lava sa manatu iai alii oloo tauaveina ana toleniga, ma e lagolagoina foi e lana faiaoga, ona e iai lava le talitonuga, ma itu lelei e faavae ai o le mafuaaga lea, ma e matua fesoasoani tele lea tulaga i lona taumafai, aemaise lava le faamoemoe o loo lupe nei.
O le vaiaso atoa lenei o le a feagai ai Tavita ma ana koleniga tamoe e pei ona fuafuaina, atoa ai ma isi ana tapenaga i lona mafaufau. O le toe manaoga o le alo o le atunuu tulou lona suafa, o loo ia manaomia pea le lagolago a le atunuu e ala i le tatalo mo ia, ina ia faataunuuina pea le miti mai le amataga.
O le toe upu a le susuga ia David Tua o lona malosi i le tino ua talitonu i ai ua lava taoso, o lona malosi foi i le mafaufau ua ia mautinoa foi lona lelei, ae toe la o le faatinoina o loo faatali nei i ai, ma e maua le tali i le taimi e fesagai ai ma lana paga i totonu o le maea, ma lona lava faamoemoe e tuuina atu pea lenei taleni ua ia mauaina, ina viia ai le Atua.