Ua saini le konekalate ale NZ Under 20s hooker JP Sauni ma le New South Wales Warratahs mo le Super Rugby ole 2018.
Ole taalo ai o Sauni mo le Warratahs, ole a faamalosia ai le laina i luma ole sikalamu ale ‘au. Ole a taaalo faatasi ai ma Shambeckler Vui le tasi o alii Samoa talavou ile ‘au faapea foi ma Harry Johnson-Holmes, ma Cody Walker o i latou ia ole a sui ia Tom Robertson ma Sekope Kepu o tama tuai ale Warratahs ma le Wallabies. Ole tausaga 2010 na malaga ai Sauni ma lona aiga mo Ausetalia, e lei umi se taimi ae filifilia o ia mo le U20s ale Melbourne Storm. Na toe foi mai i Aukilani ile 2016 e saili sona avanoa e taalo ai mo NZ.
Na maua ai lona avanoa ile U20s a NZ mo le Ipu ole Lalolagi i Georgia. Ae o Johnson-Holmes, Vui ma Walker na taalo mo Ausetalia U20s i Georgia.
Ua fiafia Sauni i lana filifiliga e taalo mo le Warratahs. Fai mai a ia, e sili atu ai avanoa e maua i Sini nai lo Melepone. E tāua ia te ia le atina’e o lana taalo ua sauni foi o ia e faamaoni i ona tiute i totonu ma fafo ole malae, mo sona manuia ile taaloga.
Ole vaai foi lea ale Warratahs ile latou tama fou, ose tagata faamaonia ma lelei le pulea o lona olaga taalo.
Na ta’ua e Simona Cron le faiaoga ale Warratahs lona fiafia tele ina ua taalo Sauni mo lana ‘au.
“Mai le matou feiloaiga muamua na matou vaaia ai le lelei tele ole tagata o JP, e lē gata ile faatonutonuina ole matou talanoaga ae ole faavasegaina foi o ona mafaufauga agai ile taaloga.” Na ia ta’ua foi, “Ua fiafia tele le Warratahs e faaopoopo JP ile matou filifiliga mo le Super Rugby ole 2018.”
“Oloo talavou pea o ia, ma ose lu’itau foi lea ia te au e faatino la’u galuega faafaiaoga e unai ai le lelei ole taalo a Sauni, poo fea lava e taalo ai o ia ile lumanai, Warratahas poo le Wallabies, oute manao ia atoatoa ona aumai i fafo lana taleni.”
O faaupuga faagaeetia ia ale faiaoga ina ua mae’a ona saini Sauni e taalo mo le Warratahas.
