Taoto tala autu o le Tupe, leai se stimulus package

Ua taoto nei le Tala autu o le Tupe mo fuafuaga a le Malo Tutoatasi o Samoa mo le isi tausaga faaletupe e amata atu i le masina o Iulai 2009 e oo i le masina o Iuni 2010. Ae o le folasaga a le Minisita o Tupe, susuga Niko Lee Hang, i lona aotelega e le o afea ai se faamatalaga i se fesoasoani a le Malo mo pisinisi poo se stimulus package e pei ona iai se fautuaga sa tuuina atu i le kapeneta, ina ua maea se fonotaga faalauaitele a le au faipisinisi na faia i le masina o Aperila lea sa saunoa ai le Palemia. O le finauina e le au faipisinisi o se fesoasoani a le Malo e mafua i faaletonu o tamaoaiga o le lalolagi lea ua aafia ai ma Samoa.
O le otootoga o le tala autu o le tupe 2009/2010 o loo faatatauina ai ni tupe maua e tusa ma le $555,731,389. O tupe maua masani e $398,930,675, ae o tupe faameaalofa mai fafo e $152,800,714. E $741,163,437 tupe faaalu ua fuafuaina e aofia ai tupe faaalu faaletulafono e $75,345,217, tupe faaalu i polokalame 383,125,598, tupe faaalu i atinae 271,198,854, ae o tupe faaalu le fuafuaina e $11,493,768. O tupe pau poo tupe o le a maua e $189 miliona, 432 afe ma le 48 tala. O le faasiliga o tupe faaalu nai lo tupe maua e $189 miliona 4 selau afe tala (189.4) e tusa lea ma le 11 pasene o le tuuaofaiga o le tamaoaiga.
Faaalia e le Minisita o Tupe, o le a faatupe mai lea i nonogatupe e mama tului faapea tupe faameaalofa mai paaga a le Malo. Fai mai le minisita i lana saunoaga o le tala autu o le tupe, e ui ina ogaoga le pau i le Tala o le tupe peitai e manatu le Malo ua talafeagai lea ona o le naunau e toe lalaga le atinae o le tamaoaiga ina ia mafai ona toe ausia se tulaga mausali i se taimi vave. Ua ave le faamuamua a le Malo i atinae o loo faatulaga i le taiala o le tamaoaiga e pei o aoaoga, soifua maloloina, faatoaga, ma atinae tetele e pei o le eletise, suavai, auala ma ala laupapa, ma le kamupani vaalele o le Polenisia, lea e tasi le miliona o le a tuuina atu e fesoasoani ai i Polenisia mo le totogiina o sana nonogatupe i le faletupe o le Westpac Bank sa faatau mai ai le vaalele laititi Twin-Otter.
O loo faatali le Malo i se lipoti a le komiti faapitoa e iloiloina totogi le Salary Tribunal ona faatoa maua ai lea o se faatatau pe faia se siitaga mo totogi o tagata faigaluega a le Malo. Faaalia e le Minisita o Tupe e tele ni vaega taua ua mafua ai ona faatuai ona faatino lea fuafuaga, e mafua ona o tulaga faaletonu ogaoga ua feagai ma le tamaoaiga o Samoa e afua mai i faaletonu o tamaoaiga o atunuu mauoloa o le lalolagi e pei o Amerika. E taua foi e pei ona saunoa le minisita ona iloilo totoa le aafiaga o se siitaga o totogi o le Malo ma pisinisi tumaoti aua e taua le gafatia ae aua nei avea o se tulaga e siitai ai tau o le faatinoga o pisinisi ma atili ai ona tutaia le atinae o le tamaoaiga.