Tamaitai e toatasi ua matai i Fusi Safata

O le tamaitai o Taiai Pisa na faaee i ai le suafa tamalili o Tuaalii e lona aiga o sa Maugaga‘i i Fusi Safata. O se faaeaea na ta‘ua e lenei tamaitai ua maoae ma e lei iai sona manatu o le a vave oo i ai i lenei taimi o lona soifua.
E ui o lea ua ia talia ma le faafetai le faaaloalo ua taulimaina mai i lona aiga ma lona manaoga e fesoasoani i soo se auala e manaomia ai lona tagata e lona aiga.
O le faaiuga o le vaiaso ua tuanai na potopoto ai le afioaga o Fusi Safata aemaise o le mamalu o le itumalo i le Laoa o Laupule o le maota fono o le aiga ua faasino i ai lenei sauniga tāua. O le paia lava lea  i le aiga sa Tunumafono, Taulauniu ma Aitutagata ma le mamalu o le Alataua.
O nofo a le aiga o sa Maugaga‘i na aofia ai le suafa ua faaee i le tamaitai o Taiai Pisa, le suafa Tuaalii ma le isi suafa alii o Maugaga‘i na faaee lea ia Solomona Mauava Pisaleano.
Faaalia e le Afioga Maugaga‘i Solomona, na gata mai se sauniga faapea i totonu o lo latou aiga i le tusa ma le ono tausaga talu ai ma o le mae‘a lava lea ona faamautu se finagalo autasi o le aiga lautele o lea la ua faatino ai loa lenei faamoemoe.
E to‘a 16 na faaee i ai suafa matai ma e aofia ai ma i latou na nofo i suafa tulafale o Tiumalu, Matuaifaiga ma Maotapule.
O le faatautaia ai o lenei sauniga ua faaalia ai e le Afioga Maugaga‘i Solomona, ua ausia ai foi se isi laasaga i nofo i totonu o Fusi ona o le taimi muamua lea ua nofo ai se tamaitai o le afioaga i se suafa matai.
O se faaeaea ua molimauina na o alii lava o le afioaga ua o latou umia. E leai se tapu a le afioaga i le faaee o suafa matai i tamaitai ma sa iai tamaitai na iai suafa matai peitai o le toe auina atu o mataupu a o latou aiga i le Faamasinoga ua toe soloia ai suafa na umia e ia tamaitai. O le tamaitai la o Tuaalii Taiai ua na o ia o le afioaga o Fusi i le itupa o tamaitai ua faaee i ai le suafa e pei ona ta‘ua o se suafa alii o le afioaga.
E toatolu faafeagaiga o le afioaga na faapaiaina nofo i lea aso ma o i latou uma nei o le aiga sa Maugaga‘i i Fusi na faapaiaina a latou nofo i lea sauniga.
Maugaga‘i Solomona Mauava Leano, Tuaalii Tufue Taiai Pisa, Tuaalii Alema Tuigamala, Mauava Mauigoa, Mauava Peilua, Mauava Lusi, Tiumalu Faau, Tiumalu Ta‘iau, Tiumalu Logi, Tiumalu Tasi, Tiumalu Mea‘eli, Tiumalu Isaia, Tiumalu Leatuli, Matuaifaiga Pupi, Matuaifaiga Tanielu, Matuaifaga Eneliko.