O le fautuaga ua tuuina mai ona o le malosi o le vevela o le la i lenei vaitau ua vaaia foi le mago o le mutia ma le faigata o le tulaga ua iai le tau faasoa o le suavai i itu eseese o le atunuu.
Ua amata ona vaaia le tele o mu ua sosolo ma o le fono a le Tineimu ma Tali o Faalavelave Faafuasei ma tusitala i le faaiuga o le vaiaso, e faatatau i se mu na sosolo ma faatamaia uma ai se fale na faaputu ai ni meafaigaluega ma ni meatotino a se tasi o tamalii i Vaitele, lea na sau ai ma le lapataiga a le Matagaluega lenei mo le mamalu o le atunuu e aua le faatupu ni afi e taumafai foi e susunu vaega o le atunuu ua manino le vave ona sasao ai o ni mu.
O le tausaga na tea nei na iloga le faigata aemaise i afioaga o le motu tele i Salafai e tau lē maua ai se suavai. O le itu o Asau na sau lava le sosolo o le afi ma oo mai i tuamaota o le tele o le aiga ma na agai i ai le tineimu faaopoopo mai i le motu o Upolu i le tau fui lea o le tele o mu o togavao.
O lea foi la ua amata ona vaaia le tulaga lea o le mago o le tele o togavao i le atunuu ma ua lē ‘asa lava le vaiaso ma le agai atu o le Tineimu i lipoti o afi ua faapea ona sosolo ona ole faatamala lava.
O le togi o le sikaleti i le vao o loo mago, o le fai o tafunai mo le susunu o le vao o loo salu ma le taumafai lava e susunu vaega o fanua ona o le faamamā mo galuega e pei o maumaga, o faiga uma nei ua lapatai mai le Ofisa ina ia aua ne‘i faia i lenei taimi e le atunuu a o ma‘ale‘ale ai le tau ma faigata o le lē lava o le suavai. O le mu lea i Vaitele, e lē o iloa lelei lava e le Tineimu le mafuaaga na tulai mai ai. O le leoleopo lea na faapea muamua mai le ofisa sa faia le faamatalaga na iai ni tagata na fai se moagavao i le lotoā lea na faatamaia, e oo mai i le taimi lenei o loo saili mai auā o le lipoti o lana molimau na sau lava i le ofisa o le tineimu.
Ua faamalosia tulafono e faasala ai soo se tasi e maua ua tafu se afi mo galuega pe fai foi ma le mafaufau e amata se mu ma o lea tulafono ua lua nei tausaga o faamamafa ona o le faigata o le galuega ua feagai nei foi ma le Tineimu ma Tali o Faalavelave Faafuasei i totonu o le atunuu.
O le vaitau la lenei o mugala ua faapea ona toe faamamalu ai lea tulaga seia oo atu foi i le vaitau o timuga.
