Sa maua se avanoa e fai ai se faatalatalanoaga, ma sa faalauiloa ai nisi o vaega o le latou anavatau auā foi le silafia e le mamalu o le atunuu, faapea foi ni a latou fuafuaga faataatitia faaalualu mamao, i lo latou seei ai i lenei vaitaimi, o se Itu e agaia le Malo.
O nisi nei o sui sa faatalanoa i luga o le 4EB ma e tele ni vaega tāua sa saunoa i ai le mamalu o faipule. O le afioga ia Afualo Dr Wood Salele o le faipule o le itumalo o Salega, sa saunoa i le tulaga tau tupe maua ma tupe faaalu, ma aitalafu o loo iai i le taimi nei a le Malo.
O le susuga ia Papalii Li‘o Ta‘eu Maipa‘u o le sui faipule o Faasaleleaga Nu 2, o se alii Loia sa avea foi ma Komesina lagolago o Leoleo, o ia o loo nafa ma le itu o Faamasinoga ma le Ofisa o Leoleo, i le tulaga o loo iai i le taimi nei ma faafitauli o loo iai.
O le tofa ia Lealailepule Rimoni Aiafi, o le sui faipule o Faleata i Sasae, o loo nafa ma le itu o le Ofisa o Galuega ma Vaalele Sivili faatasi ma le tele o isi atina‘e a le Malo, faapea foi ma le tofa Aveau Niko Palamo o le sui faipule o Faleata i Sisifo, sa talanoa i le tulaga tau Taaloga e pei lava ona silafia, o ia sa avea ma Faiaoga o le Manu Samoa.
O le taitai o le Itu agai, Palusalue Faapo II ma le sui faipule le afioga ia Toesulusulu Cedric Schuster sa faatalanoa i le leitio a le Penina o Asuisui, ma na faamalieina foi le faafofoga a Samoa a o la fofola ni vaega matagofie o loo latou taumafai ai e faia se ‘ai mo Samoa a o tulai mai e agaia le Malo.
Sa manuia le latou sailiga seleni a o faagasolo ai i Brisbane auā se fuafuaga mo so latou ofisa autu i Samoa.
O le afiafi o le Aso Toonai, aso 20 o Setema na toe taliu ai le faigamalaga i Samoa ma le agaga faafetai o le taitai aemaise o sui Minisita, i le tali faaaloalo a aiga, uo ma ē masani faapea tauaiga aemaise le Mafutaga Samoa Tuufaatasi i Brisbane.
