Talia tupulaga uma i le mafutaga – Youth Rally 2013

“Free for all rally 2013” O le sini lea ma le autū sa faaulutalaina ai le tuufaatasiga a ekalesia Emanuelu e fā i Aukilani i le Aso Toonai ua mavae. O lea tuufaatasiga sa faia i le hall a Samani Pulepule i Magele.
Sa vaaia le faatumulia o lea mafutaga i tupulaga talavou faapea mātua mai ekalesia eseese sa valaaulia.
O le ekalesia a le Living Water Worship Centre i Henderson faapea le Assembly of God mai Lynfield, ma le ekalesia a le Hallelujah Worship Centre i Otahuhu na latou faatinoina nisi siva faaleagaga ma ni tala faatino. Na matautia le galue o le agaga o le Atua i lena po ma faamalieina ai le galala o lana fanau.
O le fofoga o le polokalame o le susuga ia Tala Burgess, ae o le folafolaina o le upu a le Atua, o le susuga i le taitai aoao o le ekalesia, le susuga ia Mika Lagavale.
O le upu folafola na saunoa i ai le susuga i le faafeagaiga na afea ai ma nisi o vaega tāua tau i le soifuaga faalelotu ma unaia ai le faamalosi i le galuega a le Atua.
E pei lava ona masani ai i sauniga faapea le faia foi o le valaau mo soo se tasi e fia taliaina le faaolataga. Na saunoa se tasi o sui o le ekalesia o se tasi vaega na laualuga i ai lenei polokalame o le tuufaatasia pea lea o le tino o Keriso ma le faamumū pea o le taleni ma le meaalofa ua foai e le Atua i alo ma fanau.
E silia i le fāselau tagata sa latou molimauina lenei faamoemoe ma ua talafeagai lelei ai foi ma le telē o le nofoaga sa faia ai. O lenei polokalame sa mafai ona tuufaatasia e le ekalesia i Papatoetoe lea e taitaia e le susuga Mika Lagavale ma isi lala o le ekalesia e aofia ai Te Atatu i le susuga Enele Leaututu, o le lala i Onehunga a le susuga Malele Isaia ma le ekalesia i Manukau o loo taitaia e le susuga Eric Toomata Tanuvasa.
O le autū sa fai ma taiala i lenei tausaga ua faaupu faapea, “Le Alii o le filemu, avea i matou ma au meafaigaluega”.
Ua faailoa e le faauluuluga o le komiti o tapenaga, Manasa Aloalii, ua iai le faamoemoe e toe faia lenei faatasiga i le taimi faapenei i le tausaga fou pe a pule alofa le Atua e aulia ma le manuia.