O le a iloa ai foi pe na iai nisi malosiaga i tua atu na latou unaia le molimau e faia lea faamatalaga i luma o le faamasinoga
Ua talia nei e le Faamasinoga Maualuga le talosaga a se tasi o tamalii sa galue i le Matagaluega o Leoleo ma Falepuipui mo le tele o tausaga, ae ua faasalaina i le falepuipui ona o moliaga o le faia o ni uiga matagā i se faafafine talavou, ina ia toe fofogaina le mataupu na molia ai o ia.
O le fofogaina o le talosaga sa tauaveina e le alii loia o Ameperosa Roma mo le itu a Fineaso. I le iloiloina o mafuaaga o le talosaga ua faapea ona talia ai ma ua faatulaga ai nei le aso 20 o Tesema e fofogaina ai le mataupu.
E pei ona sa auina atu i se tasi o a tatou lipoti, o le toe talosagaina e Fineaso ma lana loia o se isi iloiloga, ona ua faailoa e se tasi o molimau autū a leoleo e faapea, e lē sa‘o lana molimau ma o faamatalaga uma foi na ia faia e sese.
I se mau ua oo mai, ua ta‘ua ai e faapea o le faamanatuina o le Aso Sa o Tamā i Samoa talu ai nei, na faailoa ai e le molimau le pepelo o lana mau na faia faasaga ia Fineaso.
O lea molimau o se alii pagota o loo tuli sona faasalaga i moliaga o le faasotoma ma le faia o ni uiga matagā.
Na faaalia e le molimau o le mae‘a o le lotu taeao a pagota sa faamanatu ai le Aso Sa o Tamā, na faafeiloai ai e le molimau le susuga Fineaso ma ia faailoa i ai lona agaga salamō i lana molimau na faia ona e lē moni.
O le mafuaaga lea na logoina ai loa le aiga o le alii pagota ma le loia ma faailoa i ai le tulaga ua faailoa atu e le molimau.
O le toe suesueina o lea molimau e le faamasinoga o le a mafai ona iloa ai mafuaaga tonu na faavae ai le molimau na lagolagoina ai moliaga.
O le a iloa ai foi pe na iai nisi malosiaga i tua atu na latou unaia le molimau e faia lea faamatalaga i luma o le faamasinoga.
O le taunuuga foi o ia iloiloga o le a toe suesueina ai le mataupu, o le a mafai ona maua ai se faaiuga pe talia pe teena e le faamasinoga le mau ua toe faaalia nei.
O le afioga i le faamasino o le Faamasinoga Faaitumalo, Vaepule Vaemoa Vaai, na faatautaia le suesueina o molimau ina ua suesueina le mataupu, lea na faia ai le faaiuga e faamaonia moliaga o le faia o uiga matagā, ae soloia le faasotoma faasaga ia Fineaso Aimaasu.
Sa fuafua e le faamasinoga e fofogaina le talosaga a le itu tagi i le masina o Aperila o le tausaga fou, peitai o le talosaga a le loia a Fineaso ina ia suesueina le talosaga i se taimi lata mai,
ua faapea ona faatulaga ai
le aso 20 o Tesema 2010 e fofogaina ai.
