E sese ma lē sa‘o ana tuua‘iga ona ua tele avanoa ua logo i ai mo le usitaia ma le tausisia o aiaiga o le tulafono ae na te lei logosa‘ia…Pelesetene o le Sosaiete a Loia i Samoa
O le vaiaso nei o loo faagasolo ai galuega a le faamasinoga o talosaga apili e tagofia ai mataupu i faaiuga a le Faamasinoga Maualuga ua toe talosagaina le faia i ai o se iloiloga. O le a fofogaina ai ni mataupu se lua o loo tauaveina e le tamaitai loia Samoa e faamautu i Niu Sila, le afioga Leulua‘ialii Olinda Woodroffe.
Peitai ua ua iai se faaiuga a le Sosaiete a Loia i Samoa, e taofia le tuuina atu o se tusi faamaonia e faaauau ai tiute faaloia o Leulua‘ialii i le faamasinoga i Samoa mo le tausaga atoa lenei 2016. O le mafuaaga lea o le folasia o se finagalo lagomia o le tamaitai loia mai Niu Sila ona o lea faaiuga a le sosaiete.
Ua faaalia ai e Leulua‘ialii Olinda ua fetaui le faia o le faaiuga ma le oo i le taimi o mataupu o le a ia tulai ai ona e atagia ai o se taumafaiga ua aafia ai lē sa avea ma Loia Sili a le Malo ona o se tasi lea o mataupu o le a ia finauina i le faamasinoga o talosaga apili.
Ua faaalia foi e Leulua‘ialii i se lipoti i le leitio faavaomalo a Niu Sila faapea ma le nusipepa o le Samoa Observer, o se faaiuga e taofia le tuuina atu o lona tusi faamaonia e mafai ai ona galue faaloia i Samoa ua afaina ai lagona oi latou o loo ia tauaveina a latou mataupu i Samoa.
Peitai o se feiloaiga ma le pelesetene o le sosaiete a loia i Samoa le afioga Savalenoa Mareva Betham-Annandale na ia teena ai ia tuua‘iga a Leulua‘ialii Olinda Woodroffe.
“O le mea muamua lava e fia faailoa atu, e lē o se mataupu faapea na faanatinati ona matou faia, ae o se mataupu ua leva ona silafia e Olinda”.
“Ua tele avanoa e tuuina atu i ai i le tulaga o le tuai ona ia faatino manaoga o le tulafono, ae o lea lava foi ua amatalia galuega o lenei tausaga ae e lē o amanaia mai lava e le tamaitai loia le matou logo ua mae‘a ona ave i ai”.
O le finagalo lea o le pelesetene ma lana faamalamalamaga i tusitala, e lei faapea e lei logoina le loia i aiaiga o le tulafono fou lea ua manaomia ai le faamalieina o aiaiga uma o le galuega faaloia i Samoa a o lei tuuina atu tusi faamaonia e mafai ona galulue ai loia e lē gata i Samoa ae faapea foi i loia i fafo atu o Samoa.
Faaalia e Savalenoa Mareva o aiaiga foi faapea o tulafono i Niu Sila ma isi atunuu e tatau ona tausisia e loia i Samoa pe afai e iai ni a latou mataupu e fofogaina ai i ia atunuu. “O loo silafia lelei e le tamaitai loia e lē mafai ona faatamala le Sosaiete a loia i Niu Sila i aiaiga o tulafono nei auā e lē mafai foi ona tuuina mai se tusi faamaonia e faatino ai ni tiute o se loia mai Samoa e fia faatino i Niu Sila pe a lē tausisia ma usitaia aiaiga o tulafono faapenei e faasino i le matou tautua ma le galuega faaloia”.
O le tuua‘iga i le iai o se aafiaga o se tasi o loia sinia sa avea ma Loia Sili a le Malo ua matuā teena foi e le pelesetene. “E matuā sese lava lena lafoga ua ia faia, ma e lē faatonuina e se isi le finagalo o le Council a le sosaiete”.
Ua i luma nei o le Faamasinoga Maualuga se talosaga a Leulua‘ialii Olinda mo le faia o se faatagaga a le faamasinoga e faaauau ai ona faatino ona tiute faaloia i le tauaveina o mataupu e lua o le a ia tulai ai i le faamasinoga o talosaga apili.
Peitai ua faaalia le pelesetene o le Sosaiete a loia i Samoa o le a tumau le latou mau e tali atu ai i le talosaga lenei, o le taofia o le tuuina atu o se tusi faamaonia e faataga ai Leulua‘ialii ona faia ona tiute faaloia ona ua ia lē usitaia aiaiga o le tulafono mo le faamalieina uma o vaega manaomia faatoa mafai ona faatino ni tiute o se loia i Samoa.
