Radio Samoa: Faafetai ua maua mai foi lou taimi ma le avanoa, faafetai tele lava, o loo faafofoga le mamalu o le atunuu. Ia lafo atu ia i sau saunoaga, lau afioga i le Palemia.
O le ā foi se tulaga ua oo i ai le Palemene, aemaise foi faamasinoga o loo māua atu o faagasolo, aemaise foi le taitai o le Tautua Party, poo le ā se tulaga ua oo i ai i lenei vaitaimi, faamolemole Tuilaepa.
Palemia: O loo faagasolo pea faamasinoga. Ma e oo mai le taimi lenei, e lei taunuu i se taunuuga e mafai ai ona iloa se iuga o sea faipule poo le ā tonu le tulaga e oo i ai.
Pau lava le mea lea ua tupu, ua amata faamasinoga, ma o loo faasolosolo lava, o loo taufai galulue uma ai alii faamasinoga i tulaga o mea o le fesiligia foi o molimau ua mafai ona tu atu i luma o faamasinoga o loo faagasolo nei. O le tulaga foi o le Palemene, faato‘ā usu le fonotaga a le Palemene i le aso faaiu o le masina o Me.
O le taimi nei, o lea o loo galulue matagaluega eseese o le Malo i le tapenaina o le tala autū o le tupe. E iai le faamoemoe pe toe lua i le tolu vaiaso ona oo atu lea o le tala o le tupe i le Kapeneta ma faatalanoa ai, ona tapena loa lea o le tala faaiu e tuuina atu i totonu o le Palemene i le aso faaiu o le masina o Me.
Afai e toe tomanatu foi le tatou malo i taimi foi sa fai ai faiga campaign ia ma aiaiga foi ma folafolaga a le Tautua, afai e manumalo mai, e 3 a masina ua alu amata le latou fuafuaga i siitaga o totogi ma mea uma sa latou fuafuaina. Ia ma sa ou ta‘ua ai, e lē mafai ona faia se na mea e lē o talafeagai ma taualumaga o fonotaga, auā o fonotaga ia a le Pelemene, o inā faato‘ā teuteu ai se tulafono o loo manao se malo e toe teuteu.
O lea la sa ou ta‘ua ai, e lē o faavaea uma ia nei faamoemoega, ona e lē o ogatasi ma le tulaga o faatalanoaaga o le tala o le tupe i totonu o le Palemene. Auā seiloga e tauaofia le Palemene, ona mafai lea ona suia tulafono ina ia mafai ai ona faagasolo nisi o mataupu sa folafolaina e le Itu Agai, i le taimi a tatou agai atu ia tatou faiga filifiliga.
Ia lea la ua taunuu le mea sa ou talanoa ai, ona o lena foi taimi sa fetosoa‘i a faapautolo a loi le tulaga foi o manatu faaalia, ona o le mataupu sa ou lāgā ma toe faasino i le taualumaga o fonotaga, e lē mafai a ona taunuu le mataupu lea sa folafolaina e le Itu Agai i lena taimi.
Ia lea a la ua taunuu, o le taimi nei o loo faagasolo a galuega i totonu o matagaluega i le tapenaina o le tala o le tupe, ia ma agai atu a i le faauiga faaiu.
Radio Samoa: O lea ua faafofoga le mamalu o le atunuu. Ia talosia ia aulia atu Me, ona faataunuu ai lea o le fonotaga a le Palemene, auā foi galuega foi ma polokalama faataotooto. Komisi Fefaatauaiga i Niu Sila.
