Ina ua fesiligia a‘u poo le ā se mea a le tatou Atunuu e maua mai le Malo a John Key ma lana faigamalo i latou fuafuaga ua faataatia mai i le Tala o le Tupe poo le latou Pakeki mo le tausaga 2013 – 2014, o la‘u tali i ai ua maua le paagugu, ae ua leai se paka, ua leai foi
se siamu.
Ua maua foi le ipuki, ae ua leai se suka, ua leai foi se susu. O la‘u lava faauigaina lea o le tala o le tupe, i lau vaai i ai faafaipule – o loo iai mea o loo maua, ae o le tele o mea sa masani ona tatou maua, o le a lē toe maua.
A o tatou lei aulia le Aso Tofi ua tea, o le aso na atofa e le Malo e faalauaiteleina ai lana Tala o le Tupe mo le tausaga 2013, e ese le matagofie o le agi malu mai o folafolaga sa ave mai e le autusitala ma le aufaasalalau tala fou i le tele o faamanuiaga o le a maua e Niu Sila pe a fofola mai le tala o le tupe a le Malo a John Key.
Sa muamua ou maua le tala o le a toe faaopoopoina nisi avanoa aoga mo le autalavou a le Pasefika ma Maori. Sa faapea foi ona ou lagona le fiafia ina ua ou faalogo o le a iai le polokalame e maua ai nisi fale fou, aemaise mo latou o loo fia umia saoloto ni o latou fale mo se taimi muamua. E lē gata i lea sa aumai foi tala o le a iai le fesoasoani mo i latou o loo vaivai le tamaoaiga auā le tausiga o aiga, aemaise i latou e leai ni galuega.
Peitai ane, na vave lava ona toe oo mai le faanoanoa ina ua sau le lauga a le Minisita o Tupe, toe faaopoopo mai le lauga a le Palemia, na ona foliga mai o le a maua ni manuia, ae a tatou iloilo lelei ma auiliili vaega taitasi o saunoaga ma fuainumera o loo faavae ai le Tala o le Tupe a le Malo, e telē lava le faaletonu mo tagata lautele.
Silasila foi i le folafolaga muamua faapea ua toe faaopoopo nisi avanoa aoga mo tupulaga a Maori ma le Pasefika. Ua faapea mai le Malo o le a toe faaopoopo avanoa mai le 600 o loo iai nei ia maua le 3000 avanoa e a‘oa‘o ai nisi o tupulaga talavou i matata eseese. O le numera lava o tupulaga Pasefika o loo aooga nei i le polokalame o aoga mo matata eseese e na o le 260 mai Aukilani, Ueligitone ma Kalaisetete. Ina ua ou fesiligia le Malo pe fia avanoa faaopoopo mo tupulaga Pasefika lava ia, ae ua mumusu e tali mai i ai.
O le isi itu faaletonu, ina ua matou maua le tala atoa o le tala o le tupe i le aso na sosoo ai, ua mautinoa ai e $861,000 se vaega tupe ua lē toe maua e le Matagaluega o Mataupu Tau Tagata Pasefika (Ministry of Pacific Island Affairs) ma ua faapa‘ū ese mai galuega tāua sa masani ona faia e lea matagaluega. O le tāua o lenei matagaluega ona o loo mafai ona faaofi atu ai i le faigamalo ma isi matagaluega a le Malo se sao tāua i le vaai a tagata Pasefika. Afai e vaivai lea matagaluega, o le a faapena foi ona vaivai se sao a tagata Pasefika i faiga faavae a le faigamalo a John Key ma lana vaega.
A o le itu e aupito i sili ona faaletonu i le tipiesea o lea tino i tupe ona o lea ua aveese ai ma le $200,000 mai tupe sa masani ona faaaogāina e nisi o faalapotopotoga tuma‘oti i Aukilani mo le aoaoina o nisi o tupulaga talavou i ni polokalame aoga o matata eseese.
O le a iai foi nisi suiga faaopoopo i le matagaluega o loo nafa ma le faasoasoaina o penefiti ma tupe mo i latou e leai ni galuega. E foliga mai lava o le a faigata ona toe maua se fesoasoani tau tupe mo i latou o loo manaomia le fesoasoani.
E telē le faaletonu o le a oo i nisi o tatou aiga, auā o le a faigata le fesoasoani tau tupe pe a leai se galuega, ae o loo faamautu mai i le Tala o le Tupe, o le a tumau pea i le 5 pasene le aofai o tagata o le a leai ni galuega. E le gata i lea o le aofai o tagata Pasefika ua leai ni galuega o loo i le 15.2 pasene, ae ua oo i le 43 pasene le aofai o tupulaga talavou Pasefika i le va o le 15-24 tausaga ua leai ni galuega, ua lē aooga foi.
I le mataupu tau fale, e na o le faafoliga mai e le Malo o le a iai le fesoasoani mo latou o loo fia umia saoloto ni latou fale mo le taimi muamua, ae ua matou maua le mea o loo nanā mai tua, o lea ua naunau le Malo a le National ina ia talepe le Matagaluega o Fale, ma ia unai uma ese latou o loo afifio i fale o le Malo, ina ia o e nonofo i fale mautotogi a le aufaipisinisi. Soo se isi o loo afio i fale a le Malo, ua na o le 3 tausaga ma toe iloilo lau konekarate, ma o le a unai ese outou mai ia fale.
O se tasi o vaega mulimuli na oo i ai le matou suesuega i le Aso Toonai a o fai finauga i le maota fono, ina ua aumai le tulafono taufaaofi a le Malo ina ia sii ai le lafoga o le penisini taavale. O le a toe faaopoopo le isi 3 sene i le lita e amata i le aso 1 o Iulai 2013 ma toe faaopoopo i le tausaga 2014 ma toe faaopoopo i le tausaga 2015 seia sii i le 9 sene i le lita. Ae manatua foi o le faigamalo lava lea sa faapea mai e lē toe siia lafoga, ae o lea na muamua lava sii le GST i le 15 pasene a o lea foi ua toe faaopoopo le isi siitaga i le lafoga mo le penisini taavale. O ai e tigaina i lea siitaga, o le aufaigaluega ma tagata lautele.
O lenei pakeki, na ona foliga o le a tatou maua ai faamanuiaga, ae na o nisi lava o le aufaipisinisi tetele ma uo a le Malo e manuia, ae ua atili ai ona toe faaopoopo nisi avega mamafa i tagata lautele ua atili ai lava ona faigata le soifuaga i Niu Sila.
