E masani ona faalogoina le faitau faapea “ta muamua le gutu ona ta ai lea o le malofie” ua talafeauga le laei o malu ua laeiina e nei alo tamaitai talavou pe a fua atu i le pepese leo tetele a o faia le solo i le sulatoga ina ua mae‘a ona samaina malu.
O le Aso Toonai aso 6 o Fepuari na sami ai lagimalofie a nei alo tamaitai e faasino ia Papalii Misa ma le faletua ia Joyce (Emma ma Taalolo Misa) mai Falelatai, Malie, Tufuiopa, Salailua, Safotu ma Magiagi.
E le gata i lea o alo tamaitai o Anae Leleiga ma le faletua ia Taaloloomalo Anae (Gasetoto ma Lautusiolesalamo Anae) mai Falelatai, Faleasiu, Malie, Salailua ma Tufuiopa.
O nei tamaitai talavou e i le va o le 12 ma le 16 tausaga ae na molimau nai o latou mātua i le loto tetele, ma ua alagātatau ai lava le laeiina e i latou nei o le laei Samoa auā na maofa le aofia na ‘auai a o avea se tasi o i latou e fai ma sui e pese ma folafola le sula toga ao faafofoga le aofaseggia.
Na muai sii mea i Matautusa e ala i le faamua i le Atua na saunia e le susuga i le a‘oa‘o ia Tuiloma Lavea Puletiuatoa ona sosoo lea ma tulaga masani i le samaina o lagimalofie. Na faafofoga i latou nei e to‘a 4 i upu timai a o laasia foi lea matatia e ala i le laeiina o le malu.
O lenei galuega e tulaga ese lava ona e lua tufuga sa feagaiga ma le faatinoina o lenei faamoemoe. O le susuga ia Su‘a Popo Su‘a ma Tiumalu Antone Fuimaono, ma sa momoli le agaga faafetai o tauaiga ona o le matagofie o le faatinoina o le galuega i totonu o aso 4 ae 5 i le aso na samaina ai.
Sa taualugaina le faamoemoe i le maota o le afioga ia Auimatagi Tama Si‘a o se tasi foi o alo o le atunuu o loo galue i le ofisa o leoleo a Kuiniselani.
O faaaloalaga sa feagai ma le susuga i le aoao ia Tuiloma Lavea Puletiuatoa ae talifuaitau le susuga ia Su‘a Popo Su‘a e fai ma sui o i latou ona o le maualuluga o faaaloaloga a tauaiga.
Na faaiu lava i se tatalo na saunia e le fofoga o le aso ma ta‘ape ai le fuamanusina ina ua tau lau o le faamoemoe.
