A mauaa ma mautu ona gaosia le faavae o se fale, e iai le talitonuga o le a umi foi ma loaloa aso e faaaogāina ai sea fale. Ae a lelei ma sa‘o le faavaeina o le ola a‘oa‘oina o fanau e iai le talitonuga e atagia ia faavae mautu mo le manuia o le lumanai. O le avea ma taitai o se tulaga faaeaina, ae aua foi ne‘i avea le faaeaina e fai ma auala o le toilalo.
O le Aso Lulu e oo i le Aso Faraile (Iulai 20-22, 2011 ) na faia ai se fonotaga poo se a‘oa‘oga faamalosiau mo taitai poo ē ua ausia ma umia tulaga faataitai i totonu o galuega i aoga, mai lava i aoga amata e oo atu i aoga maualuluga i Ueligitone. Sa faafoeina lenei faamoemoe tāua ma le matagofie e sui o le TRCC (Teachers’ Refresher Course Committee) e le susuga ia Karl Vasau o le pule aoga i Holy Family School i Porirua, susuga Caroline Mareko o le faauluuluga o le Sosaiete a faiaoga o aoga amata i Ueligitone, ma le susuga Gabrielle-Sisifo Makisi o le sui o le ofisa o aoga mo le Pasifika mai Ueligitone.
O i latou nei o ni taitai iloga i totonu o le faalapotopotoga a le TRCC ona o la latou matafaoi o loo gapatia ai i le fautuaina o le matagaluega ma le pulega i ni mataupu faafouina mo le fesoasoani atili, ma le faafouina atili pea o le agavaa o faiaoga ma taitai o aoga o loo faafeagai pea ma le fitaituga i le a‘oa‘oina o fanau Pasifika.
E tusa ma le 58 sui mai aoga eseese i itu eseese foi o Niu Sila sa faaaogāina lenei avanoa matagofie auā e tamaoaiga le faasoa ma le tufa mai a tautalaga aami aemaise o le faasoa a sui o le fono.
O le mea mataina o lenei faaaoaoga, o le talaaga o le soifua a‘oa‘oina o tagata aemaise o le ausia o matatia e pei ona galulue ai nei taitai i totonu o aoga ma avea ai i latou ma puleaoga poo le fai foi ma taitai i matata o loo latou galulue ai.
Na tele foi ma felanulanuai le faasoa ma le tatala maiga o atoponapona a tautalaga aami, ma o se mitamitaga sili lava lea i le komiti na faafoeina lenei faamoemoe auā o tagata Pasefika lava ia na tatala maia le gasu o a latou galuega mo nisi foi faato‘ā faamanuiaina ma umia tulaga faataitai i totonu o a latou aoga. Tele la ni mea lelei ma le tāua na maua i le fonotaga auā e leai se sui na lei faaalia le loto fiafia ma le agaga faafetai i lenei avanoa manaia ma le tāua, ua faa‘oaina ai le malamalama ma le toe fafagu atili mai o tauiviga i nisi foi metotia ma filosofia e fetaui ona faaaogā mo le a‘oa‘oina lava o fanau Pasifika i totonu o Aotearoa nei.
O le susuga la i le faifeau Rev Falkland o le faifeau PIC i Porirua na saunia le lotu puupuu na faamua ai mea i matautusa ona faasoloa ai loa lea o le polokamale. E valu tautalaga aami e aofia ai le susuga i le tamaitai o Freda Avei-Maki mai le Sosaiete a le Toru Fetu Kindergarden, Dr Cherie Chu (mentoring), Susuga Unasa Enosa Auvaa o le pule aoga o Mt Albert Primary School, Afioga Tagaloatele Professor Peggy Fairbairn-Dunlop, Dr Lesieli Tongatio (MOE), Susuga Iva Ropati o le pule aoga Howick College. Susuga Willi Fanene (leoleo), ma le Susuga Hon, Luamanuvao Winnie Laban (Assistance Vice Chancellor Pasifika Victoria University of Wellington).
Ia o tautalaga aami nei o ni taitai ua iloga foi lo latou tulai mai e ala ia latou galuega ua uma ona faalauleleia ai le ala mo le agai atu ma le ulufale ane o nai a tatou fanau Pasifika mo a‘oa‘oga. E mae‘a lenei mafutaga ma ta‘ape foi ae ua mafana ma faateleina pea le viiga o le Atua ona o le tele o le faa‘oaina ma le faatamaoaigaina.
Ua sa‘o ai foi le isi a tatou muagaga – ua lele foi le gogo ma si ana i‘a aua ua fata luga fata lalo, ua malie o ua malie malo aua o lele ua foi le tagata ma si ana atoponapona ua matuā faatumulia i tomai ma agavaa eseese na faasafua mai e taitai o aso nei auā le a‘oa‘oina o taitai o le lumanai.
O le agaga faafetai tele e momoli atu i le komiti ona o la outou lagolagosua ma la outou matafaioi o le togimaa pea i le pulega a le TRCC, ina ia faaauau pea ma faatupulaia pea nisi avanoa lelei e faataunuuina ai faafouina faapenei mo le tomatauina pea o o tatou tagata ma taitai auā lava le auga e tasi o fanau Pasifika ia manuia. Malo fai o le faiva faafetai saili malo
